“Avropa Şurası Parlament Assambleyasına (AŞPA) yeni sədr İspaniyanın Valensiya bölgəsindən Pedro Aqramunt seçilib. O, bu təşkilatda uzun illər Azərbaycan üzrə həmməruzəçi vəzifəsində çalışıb. AŞPA-ya sədrlik etmək bir qədər formal vəzifədir. Əsas Avropa Şurasının illik keçirilən iclasları, oradakı müzakirələr və qərarlardır. Sözsüz ki, AŞPA sədrinin qanunlar çərçivəsində hadisələrə təsir etmək imkanları var. Amma hər şeyi deputatların səsverməsi və onların müzakirələr zamanı irəli sürdüyü fikirlər həll edir”. Bunu açıqlamasında politoloq Qabil Hüseynli deyib.
O, AŞPA-da “Dağlıq Qarabağ və Sərsəng su anbarı” və “Azərbaycanın sərhədyanı ərazilərində yaşayan əhali qəsdən sudan məhrum edilmişdir” adlı iki məruzə ətrafında müzakirələr aparılacağının və qərar qəbul ediləcəyinin çox əhəmiyyətli olduğunu qeyd edib: “Ümumiyyətlə Avropa Şurası Azərbaycanla bağlı məsələlərdə nisbətən obyektiv mövqe tutur. Məsələn, Ermənistanın Azərbaycana qarşı təcavüzünü ilk dəfə Avropa miqyasında səsləndirən Avropa Şurası olub. İndi isə qış sessiyasında Sərsəng su anbarı ilə bağlı məsələ müzakirə olunacaq. Qarabağın düzən rayonlarında əhalinin su ilə təchizatının qəsdən pisləşdirilməsi haqqında iki məsələ gündəmə gələcək. Hər iki məsələ bir-biri ilə bağlı olsa da, ayrı-ayrılıqda müzakirə ediləcək. İndidən müzakirələr haqqında yayılan fikirlər çox müsbətdir. Sərsəng su anbarından suyun yay və yaz aylarında suvarma zamanı kəsilməsi və onun qış aylarında gecə vaxtı buraxılması süni ekoloji böhran yaratmaq məqsədi güdür. Bu, yerli əhalinin maddi durumuna, kənd təsərrüfatı sektorunun inkişafına çox ciddi mənfi təsir göstərir. Təklif irəli sürülür ki, Sərsəng su anbarı bölgəsi erməni əsgərlərindən təmizlənməli, su anbarı əvvəlki qaydada, normal ritmdə işləməli, su öz axarı ilə əvvəlki kimi, kanallar və ya çaylar sistemi ilə axıdılmalıdır. Qəbul olunması nəzərdə tutulan qərarlar çox müsbətdir. Zənnimcə, Sərsəng su anbarının məsələsi Avropa Şurası tərəfindən tənzimlənsə və həqiqətən də əhalinin su təchizatı yaxşılaşdırılsa, bu, inqilabi bir qərar olmaqla, yerli əhalinin kənd təsərrüfatı ilə məşğul olmasına da geniş imkan yaradar. Ümumiyyətlə ekoloji problem dünyada bir nömrəli əhəmiyyət kəsb edən məsələdir”.
Politoloq bildirib ki, yeni sədrin uzun illər Azərbaycan üzrə həmməruzəçi vəzifəsində çalışması da məsələnin populyarlaşmasına şərait yaradacaq: “Əminəm ki, Avropa Şurası müsbət qərar qəbul edəcək”.
Son şərhlər