Kreml terrorizmlə mübarizə üzrə İslam ittifaqının yaradılmasını şərh edib.

Publika.az “Kommersant” nəşrinə istinadən xəbər verir ki, Rusiya prezidentinin mətbuat katibi Dmitri Peskov ekstremizmlə mübarizədə səylərin birləşməsini “pozitiv hadisə” adlandırıb.

Prezidentin mətbuat katibi həmçinin bildirib ki, Kremldə Səudiyyə Ərəbistanın himayəsi altında yaradılan hərbi koalisiyasının detallarını öyrənirlər.

“Əlbəttə, ekstremizmlə mübarizədə səylərin birləşməsi pozitiv hadisədir. Amma sözsüz ki, qiymət vermədən əvvəl detalları öyrənmək lazımdır. Ətraflı informasiya lazımdır ki, koalisiyanın hansı ümumi məqsədləri var”, – Peskov bildirb.

İslam ittifaqının yaradılmasını şərh edən Rusiya Federasiya Şurasının beynəlxalq məsələlər üzrə komitənin başçısı Konstantin Kosaçev hesab edir ki, Səudiyyə Ərəbistanının təşəbbüsü ən azı iki səbəbdən maraqlıdır: “Birincisi, radikal islama qarşı islam ölkələrini birləşdirmək cəhdidir. Bu mümkün olsa, terrorçuluğa qarşı mübarizə kontekstində Səudiyyənin təşəbbüsü faydalı ola bilər. İkincisi, koalisiyada İran və İraq yoxdur. Şübhəsiz ki, bu halda effektiv koalisiya haqqında danışmaq mümkün deyil. Xatırladım ki, bu ölkələrlə Rusiya fəal əməkdaşlıq edir”.

Xəbər verildiyi kimi, Səudiyyə Ərəbistanın paytaxtı Ər-Riyadda dünən 34 ölkənin iştirakı ilə terrorizmlə mübarizə üzrə İslam ittifaqı yaradılıb. İttifaq güclərinin koordinasiyası Ər-Riyaddan həyata keçiriləcək.

İttifaqa Səudiyyə Ərəbistanı, İordaniya, BƏƏ, Pakistan, Banqladeş, Bəhreyn, Benin, Türkiyə, Çad, Toqo, Tunis, Cibuti, Seneqal, Sudan, Syerra-Leone, Somali, Qabon, Qvineya, Fələstin, Komorski Adaları, Qətər, Kot-d’İvuar, Küveyt, Livan, Liviya, Mali, Maldiv Respublikası, Malayziya, Mərakeş, Misir, Mavritaniya, Niger, Yəmən və Nigeriya daxildir.

Qeyd edək ki, hazırda Suriyada terrorizmlə mübarizə adı ilə iki koalisiya fəaliyyət göstərir. Onlardan biri ABŞ-ın rəhbərlik etdiyi beynəlxalq koalisiyadır. Digər koalisiyaya isə Rusiya, Suriya, İran və Livanın “Hizbullah” təşkilatı daxildir.