APA-nın Avropa müxbiri xəbər verir ki, Ann Brassör media nümayəndələrinə AŞPA sessiyasının yekunlarına dair məlumat verib.

O, AŞPA sessiyasının keçirildiyi müddət ərzində “erməni soyqırımı”nın 100 illiyinin qeyd edilməsi ilə bağlı tədbirlərə toxunsa da, Avropa Şurasında “soyqırımı” kəlməsinin işlədilmədiyini söyləyib: “Əlbəttə ki, mən “soyqırımı” sözünü işlədə bilməzdim, çünki bu, Avropa Şurasının rəsmi mövqeyi deyil”.

AŞPA-da deputatların məsələ ilə əlaqədar imzaladıqları bəyannaməyə gəldikdə, Ann Brassör sənədin Assambleyanın qərarı olmadığını, yalnız onu imzalayan parlamentarilərin mövqeyini əks etdirdiyini bildirib. “Arzu edirəm ki, anım mərasimi, Türkiyədəki seçkilər və bir az zaman keçdikdən sonra tərəflər bir araya gələcək, sülh və əmin-amanlıq içində öz gələcəklərini quracaq”, – deyə o vurğulayıb.