Gürcüstan prezidenti Mixail Kavelaşvili Tbilisidə xorvatiyalı həmkarı Zoran Milanoviçlə danışıqlardan sonra keçirilən mətbuat konfransında deyib ki, avropalı bürokratlar Aİ-nin genişlənmə siyasətindən tez-tez manipulyasiya aləti kimi istifadə edirlər, lakin bu, baş verməməlidir.
Elchi.az bu barədə “Reuters”ə istinadən xəbər verir.
“Qeyd etmək vacibdir ki, Aİ-nin genişlənməsi siyasəti avropalı bürokratların tez-tez etdiyi kimi manipulyasiya aləti kimi istifadə edilməməlidir. Biz bu məsələdə səmimi olmağa çalışacağıq. Biz həmişə cəmiyyətimizi məlumatlandırırıq ki, milli maraqlarımızdan çıxış edərək, avropalı bürokratların bizimlə necə rəftar etməsindən asılı olmayaraq, biz hər zaman istənilən səviyyədə əlaqələri davam etdirməyə hazırıq”, – deyə Kavelaşvili bildirib.
Gürcüstanın dövlət başçısı həmçinin qeyd edib ki, Gürcüstan-Avropa İttifaqı münasibətləri hazırda bir sıra problemlərlə üzləşib. O, konstruktiv və fəal dialoqun bu fikir ayrılıqlarını aradan qaldırmağa imkan verəcəyinə əminliyini ifadə edib.
2024-cü ilin mayında Gürcüstan parlamenti “Xarici təsirin şəffaflığı haqqında” qanunu qəbul etdi və ölkənin Aİ və ABŞ ilə münasibətləri pisləşməyə başladı. Aİ dəfələrlə Gürcüstan hakimiyyətini qanundan əl çəkməyə çağırıb, lakin “Gürcü Arzusu – Demokratik Gürcüstan” partiyasının liderləri ardıcıl olaraq israr ediblər ki, qanunun məqsədi Gürcüstanda fəaliyyət göstərən, bəziləri ölkədə inqilab etməyə cəhd edən QHT-lərin maliyyə axınlarında şəffaflığı təmin etməkdir.
Yeganə
