Sərdar Cəlaloğludan AXCP sədri barədə sərt fikirlər, ittihamlar 
ADP sədri Sərdar Cəlaloğlu “Hürriyyət” qəzetinə geniş müsahibə verib. S.Cəlaloğlu müsahibəsində öncə dialoqla bağlı dövlət başçısı İlham Əliyevə yox, Prezident Administrasiyasının ictimai-siyasi şöbəsinin Əli Həsənova müraciətlərinin səbəblərinə toxunub. Bildirib ki, YAP-ın qurultayında həm bu partiyanın, həm də hakimiyyətin siyasi partiyalarla dialoq üzrə komissiyasının sədri Əli Həsənov təyin olunduğu üçün müraciət ona göndərilib.
Onun sözlərinə görə, dialoq baş tutarsa, siyasi məhbusların azad olunması, proporsional seçki sisteminin bərpası, ölkədə seçkilərin təşkilinin yaxşılaşdırılması, Dağlıq Qarabağ məsələsində iqtidar-müxalifət həmrəyliyinin yaradılması kimi məsələlər müzakirə oluna bilər. “Sizin dialoq təklifinizi hakimiyyətlə siyasi bazarlığa cəhd kimi qiymətləndirənlər oldu” sualına cavabda isə S.Cəlaloğlu bunu politologiya bisavadlığının nəticəsi adlandırıb: “Azərbaycanda bir neçə dəfə biz bunu etmişik. Bax, həmin Əli Kərimli, İsa Qəmbər, Etibar Məmmədov, Lalə Şövkət və mənim iştirakımla, Anarın, Elçinin təşəbbüsü altında, Əli Həsənov, Əli Əhmədov hökumət tərəfdən, bir neçə nəfər də deputat bir dəyirmi masa keçirdik. O vaxt vəziyyət olduqca pis idi. Təzə-təzə Əli Kərimli haqda biədəb şeylər qaldırırdılar, iqtidar-müxalifət arasında çox kəskin qarşıdurma vardı, onda biz də bu dialoqu təşkil etdik. Xeyir ola, onda Əli Kərimli dialoqda iştirak edirdi, indi əleyhinə çıxır?! Çünki onda Əli Kərimlinin məsələsi var idi”.
S.Cəlaloğlu müsahibəsində Ə.Kərimlinin ünvanına sərt ifadələr səsləndirib. ADP sədri deyib ki, Ə.Kərimli cəbhəsi özlərinin iştirak etdiyi, içində olduğu hər şeyin düzgün olduğunu, qalanların yanlışlığını müdafiə edir: “Bu, gülünc bir şeydir. Sən kimsən axı?! Sən heç özünü idarə edə bilmirsən, gəlib məni idarə edə bilərsən? Sən kimsən qiymət verirsən?! İlhamə artistlərə ad verdiyi kimi Əli Kərimli də özünə belə bir missiya götürüb. Azərbaycanda siyasi partiyalara ad qoyur ki, Müsavat filandır, AMİP filandır, bunlar satqındır. A bala, sənə bu hüququ kim verib? Sən də siyasətin primadonnasısan? Belə şey olar?”
ADP sədri eyni zamanda AXCP fəallarının sosial şəbəkədəki davranışlarına da toxunub. Deyib ki, u dialoqla bağlı onları ən pis küçə söyüşləri ilə təhqir edirlər: “Bilirsiz ki, vaxtilə hökumət tərəfindən Əli Kərimlinin özünün ləyaqətini alçaldan çoxlu materiallar gedirdi, qəzetlərdə, internet saytlarında yazırdılar. İndi Əli Kərimli papağını qabağına qoyub fikirləşsin ki, o vaxt hökumətin onun əleyhinə bu üsulla apardığı təbliğat, siyasi mübarizə ədalətli və düz idisə, qəbul edirsə ki, iqtidar onun haqqında deyilənləri düz edirdi, bu şeyi davam etdirsin, mən razıyam. Yox, əgər düz deyilsə, qulbeçələrinin ağzını yığışdırsın, onları tərbiyə etsin. Siyasi partiyaların əsas vəzifələrindən biri vətəndaş tərbiyə etməkdir, pozğun küçə uşaqları tərbiyə etmək deyil. Sən uşaqları öyrədirsən, gedib otururlar internetdə, analarının-bacılarının oxuduğu sosial şəbəkələrdə ağızlarına gələn küçə söyüşləri yazırlar, tərbiyəsizlik edirlər. Ola bilsin, heç uşaqlar deyil, böyüklərdir, amma hər halda qoy bilsin ki, vaxtilə onun özünə qarşı iqtidar belə bir kampaniya aparıb, onda biz Əli Kərimlini müdafiə edirdik. Bu gün Əli Kərimli sosial şəbəkələrdə həmin üsul və metodlarla bizə qarşı mübarizə təşkil edib, bunu düşünsün”.
Son şərhlər