İyulun 13-də Amerika Birləşmiş Ştatlarının Azərbaycandakı səfirliyi mübarək Ramazan ayı münasibətilə iftar mərasimi təşkil edib.
“Qafqazinfo”nun məlumatına görə, səfir Robert Sekuta müqəddəs Ramazan bayramı münasibətilə təşkil edilən tədbirdə iştirak etdiklərinə görə Azərbaycandakı dini icmaların rəhbərlərinə, diplomatlara təşəkkür edib.
Səfir qeyd edib ki, səfirliyinin hər il təşkil etdiyi iftar mərasimi yalnız Azərbaycandakı və ABŞ-dakı müsəlmanları deyil, dünyanın müxtəlif ölkələrindən olan müsəlmanları birləşdirir. Azərbaycandakı tolerantlıq mühitindən danışan səfir müxtəlif dinlərə mənsub insanların ölkəmizdə qarşılıqlı anlaşma və hörmət şəraitində yaşamasının dünyaya örnək ola biləcəyini qeyd edib.
Müqəddəs Quran dini mənsubiyyətindən asılı olmayaraq hər bir insana qarşı sevgi və şəfqət hissi aşıladığını bildirən səfir deyib:
“Biz bu keyfiyyətlərlə birgə irəliləyə və təlatümlü dünyamızda bəlaların öhdəsindən gələ bilərik”.
Qafqaz Müsəlmanları İdarəsi sədrinin müavini Hacı Fuad mübarək gündə insanlara mehribanlıq, səmamıza açıqlıq arzulayıb, dünyamızda sülhün bərqərar olması üçün dualar edib.