ABŞ Hindistanı astronavtların Ay üzərinə enməsini və ayətrafı pilotlu stansiyanın yaradılmasını nəzərdə tutan və 2019-cu ildə start verilən “Artemida” proqramına qoşulmağa dəvət edib.
Elchi.az xəbər verir ki, ABŞ-nin Nyu-Dehlidəki səfirliyinin verdiyi məlumata görə, dəvət Milli Aeronavtika və Kosmik Tədqiqatlar İdarəsi (NASA) tərəfindən Hindistan Kosmik Tədqiqatlar Təşkilatının (ISRO) rəhbərliyinə Bangalorda keçirilən Elmi və Texnoloji Əməkdaşlıq üzrə Hindistan-Amerika İşçi Qrupunun iclasında təqdim olunub.
“NASA “Artemida” proqramı çərçivəsində iki ölkə arasındakı tərəfdaşlığı inkişaf etdirərək ISRO-nu Ayın mənimsənilməsi proqramına qoşulmağa dəvət edib. Tərəflər həmçinin bu sazişlər çərçivəsində elmi məlumatların açıq mübadiləsi sahəsində əməkdaşlığı irəli aparmaq barədə razılığa gəliblər”, – deyə məlumatda bildirilir.
Diplomatik missiya əlavə edib ki, işçi qrupunun iclasında tərəflər gələcək kosmik tədqiqatlar və pilotlu kosmik uçuşlar texnologiyaları sahəsində əməkdaşlığın genişləndirilməsini müzakirə ediblər.
“The Times of India” nəşrinin qeyd etdiyi kimi, “Artemida” proqramına qoşulmaqla Hindistan Ayın tədqiqində iştirakını genişləndirə və tərəfdaşlara elm, texnika və pilotlu kosmik uçuşlar sahəsində əməkdaşlıq imkanları təqdim edə bilər. Əvvəllər ABŞ və Hindistan pilotlu kosmik uçuşları iki ölkənin kosmik agentlikləri arasında geniş strateji tərəfdaşlıq çərçivəsi də daxil olmaqla, daha dərin əməkdaşlıq sahəsi kimi müəyyənləşdirmişdilər.
ABŞ “Artemida” proqramında iştirakla bağlı Avstraliya, Böyük Britaniya, İtaliya, Kanada, Birləşmiş Ərəb Əmirlikləri və Yaponiya da daxil olmaqla 61 ölkə ilə saziş imzalayıb.
Məryəm
