ABŞ Livan ordusuna və təhlükəsizlik qüvvələrinə 72 milyon dollar nağd pul verəcək.
Elchi.az xəbər verir ki, bu barədə məsələ Livanın paytaxtı Beyrutda Birləşmiş Millətlər Təşkilatında (BMT) ABŞ-ın Beyrutdakı səfiri Doroti Şinin də qatıldığı toplantıda müzakirə edilib.
Görüşdən sonra Şi Livan Ordusunun Baş Qərargah rəisi general-leytenant Cozef Avn və Livan Daxili Təhlükəsizlik Qüvvələrinin komandanı general-mayor İmad Osman ilə ABŞ-ın təklif edəcəyi dəstək barədə birgə mətbuat konfransı keçirib.
Şi mətbuat konfransında deyib:
“ABŞ Konqresi təhlükəsizlik yardımının böyük bir hissəsini Daxili Təhlükəsizlik Qüvvələri və Livan Ordusuna yenidən bölüşdürməyə razılaşıb”.
Yardım çərçivəsində hərbçilərə aylıq ödəniş ediləcəyini ifadə edən Şi bildirib ki, təhlükəsizlik işçilərinə 6 ay müddətində hər biri 100 dollar olmaqla 72 milyon dollar ödəniləcək.
ABŞ-ın orduya təklif etdiyi nağd yardımdan danışan Baş Qərargah rəisi Avn qeyd edib:
“Beynəlxalq ictimaiyyətin hərbi qurumları qorumaq istəyi Livanın təhlükəsizlik cəbhəsində çökməsinə imkan verməyəcəyini göstərir”.
Livanda iqtisadi böhran
Livan xüsusilə 2019-cu ildən bəri ciddi iqtisadi böhranla mübarizə aparır. Livan Mərkəzi Bankında dollar likvidliyi problemi və valyuta ehtiyatlarının “əriməsi” ölkədə digər ciddi böhranların yaranmasına səbəb olub.
Dünya Bankının Livanla bağlı 2022-ci ilin avqust ayında dərc etdiyi son hesabatında, sözügedən iqtisadi daralmanın yalnız müharibəyə şahidlik etmiş ölkələrdə yaşana biləcəyinə diqqət çəkilir.
Dünya Bankının 2022-ci il noyabrın 11-də dərc edilən digər hesabatında qeyd olunub:
“Dünya Bankı hesab edir ki, maliyyə itkisi 72 milyard dolları keçib və bu rəqəm Livanın 2021-ci ildəki ümumi daxili məhsulundan 3 dəfə çoxdur”.
Yeganə