ABŞ-da milyonlarla insanın izlədiyi “tam günəş tutulması” zamanı yaşanan göz ağrısının artması axtarış sistemlərinin statistikası sayəsində üzə çıxıb. Bu, bir çox insanın təhlükəsizlik tədbirlərinə məhəl qoymadığını göstərir.
Elchi.az xəbər verir ki, günəş tutulmasını ehtiyatsızlıqla izləyən amerikalıların gözləri ağrıyır.
Şimali Amerikada milyonlarla insanı valeh edən 2024-cü ilin ilk tam Günəş tutulması dünən səmanı bəzəyib.
Meksikanın Mazatlan şəhərində yerli vaxtla saat 11:07-də başlayan Günəş tutulması ABŞ-ın şimal-şərqinə doğru hərəkət edib və Kanadada saat 17:16-da başa çatıb.
Tam tutulma təxminən 44 milyon insanın yaşadığı Meksika, ABŞ və Kanada üzərindən 6 min 437 kilometr uzunluğunda və 186 kilometr enində bir marşrut izləyib.
ABŞ-da Günəş tutulmasının müşahidə edildiyi əsas şəhərlər Dallas, İdabel, Littler Rok, Poplar Blaff, Paduka, Karbodeyl, Evansvil, Klivlend, Eri, Buffalo, Burlinqton, Lankaster və Karibu olub.
Meksika, ABŞ və Kanadada milyonlarla insan bu nadir astronomik hadisənin şahidi olmaq üçün tam tutulmanın baş verəcəyi bölgələrə axın edərkən, tutulmanı müşahidə etmək üçün infraqırmızı və ultrabənövşəyi şüaları bloklayan sertifikatlı Günəş tutulması eynəklərindən istifadə etmək tövsiyə olunur.
Günəş tutulması ilə əlaqədar bir çox yerlərdə həvəskarlar üçün mədəni və elmi tədbirlər təşkil edildi; Bəzi bölgələrdə səlahiyyətlilər “günəş tutulması turizmi” səbəbiylə həddindən artıq nəqliyyat və insan axını səbəbiylə fövqəladə vəziyyət elan edərək təhlükəsizlik tədbirləri görməyə çalışıb.
Şayəstə Hüseynova
Son şərhlər