Bildirilir ki, ABŞ İranla əlaqəli hərbi əməliyyatlara – bu əməliyyatların başladığı 28 fevral tarixindən 16 oktyabr tarixinə qədər – təxminən 47,1 milyard dollar xərcləyib.
Elchi.az xəbər verir ki, “The New York Times” (NYT) qəzetinin məlumatına görə, ABŞ Müdafiə Nazirliyi (Pentaqon) ötən həftə Konqresə bu hərbi əməliyyatlarla bağlı xərclər barədə hesabat təqdim edib.
Pentaqonun son hesablamalarını açıqlamasından bəri, təxminən altı həftə ərzində münaqişənin xərcləri daha 3,5 milyard dollar artıb.
ABŞ-ın 28 fevral – 16 oktyabr tarixləri arasında İranla bağlı əməliyyatlara xərclədiyi 47,1 milyard dolların 60 faizdən çoxu bombalara, raketlərə və digər sursatlara yönəldilib.
Bu çərçivədə, sursatlara çəkilən xərclər 29 milyard dollara çatıb ki, bu da “Patriot” hava hücumundan müdafiə raketləri də daxil olmaqla, bəzi kritik silah ehtiyatlarının tükənməsinə səbəb olub.
Bundan əlavə, ABŞ Asiya və Avropada yerləşdirilmiş hərbi hissələr üçün nəzərdə tutulan sursat ehtiyatlarından istifadə edib.
Bölgəyə 50 mindən çox hərbçi cəlb edən ABŞ, Quru Qoşunlarının fəaliyyətinə 2,1 milyard dollar, döyüş təyyarələri və bombardmançı eskadrilyaların iştirak etdiyi Hərbi Hava Qüvvələri əməliyyatlarına 7,6 milyard dollar, həmçinin təyyarədaşıyan gəmilər də daxil olmaqla 20-dən çox hərbi gəminin bölgəyə göndərilməsinə isə 1,5 milyard dollar xərcləyib.
Şayəstə
