İran Prezidenti Məsud Pezeşkian bildirib ki, ABŞ və İsrailin onun ölkəsinə qarşı həyata keçirdiyi hücumlar qlobal enerji təhlükəsizliyi və dünya iqtisadiyyatı üçün təhdid yaradır.
Elchi.az xəbər verir ki, Moskvada keçirilən və Rusiya Prezidenti Vladimir Putinin də iştirak etdiyi Qaz İxrac Edən Ölkələr Forumunun (GECF) 8-ci Sammitində çıxış edən İran Prezidenti Məsud Pezeşkian qeyd edib ki, qlobal enerji təhlükəsizliyi misli görünməmiş çağırışlarla üz-üzədir. O, siyasi danışıqların davam etdiyi bir vaxtda ABŞ və İsrailin İrana qarşı iki mərhələli hərbi hücum təşkil etdiyini vurğulayıb. Pezeşkian deyib: “Ölkəmizin enerji infrastrukturunun məhv edilməsi və enerji resurslarının tranziti qarşısında süni maneələrin yaradılması birbaşa qlobal enerji təhlükəsizliyini və dünya iqtisadiyyatını təhdid edir. ABŞ İrana qarşı sanksiyalar tətbiq etməklə yanaşı, həm də dəniz və hava blokadası həyata keçirir; Vaşinqton administrasiyası digər dövlətlərə də bu blokadaya riayət etmələri üçün təzyiq göstərir”.
İranın dünyada ikinci ən böyük təsdiqlənmiş təbii qaz ehtiyatlarına malik olduğunu vurğulayan Pezeşkian bildirib ki, ölkəsi uzun illərdir tətbiq olunan sanksiyalara baxmayaraq, enerji sektorunda hasilatı artırmağa nail olub.
Şayəstə
