“Qarabağ” İnformasiya Kommunikasiya Texnologiyaları Gənclər ictimai birliyinin sədri Nurəddin Mehdiyevin rəhbərlik etdiyi təşkilatın fəaliyyəti ilə bağlı danışdı.
“Qarabağ” İnformasiya Kommunikasiya Texnologiyaları Gənclər ictimai birliyi Ermənistan-Azərbaycan münaqişəsi, işğaldan azad edilmiş ərazilərimizin tarixi, mədəni irsi və işğalın nəticələri haqqında ölkə daxilində və beynəlxalq ictimaiyyət arasında məlumatlılığın artırılmasını, xüsusilə gənc nəslin maarifləndirilməsini fəaliyyətinin əsas istiqamətlərindən biri kimi müəyyənləşdirib.
Təşkilatımızın başlıca məqsədlərindən biri Qarabağ və Qərbi Azərbaycan həqiqətlərinin müasir informasiya-kommunikasiya texnologiyalarının imkanlarından istifadə etməklə geniş auditoriyaya çatdırılması, tarixi-mədəni irsimizin tanıdılması və gənclərin bu istiqamətdə maarifləndirilməsidir. Eyni zamanda, keçmiş məcburi köçkünlərin doğma torpaqlarına qayıdışı və işğaldan azad edilmiş ərazilərin bərpası və dirçəldilməsi prosesinə ictimai dəstəyin gücləndirilməsini vacib hesab edirik.
Çoxillik layihə idarəetmə təcrübəsinə malik təşkilatımız ötən illər ərzində Qarabağ və Qərbi Azərbaycan mövzularında çoxsaylı layihələr həyata keçirib, sənədli və animasiya filmləri, virtual səyahətlər və digər multimedia məhsulları hazırlayıb. Bu layihələrin əsas məqsədi tarixi həqiqətlərin, milli-mədəni irsimizin və xalqımızın yaşadığı faciələrin müxtəlif yaş qruplarına, xüsusilə gənclərə müasir və anlaşıqlı formatlarda çatdırılması olub.
Bu istiqamətdə hazırladığımız məhsullar sırasında Azərbaycan, ingilis, rus, türk və fransız dillərində təqdim edilən “Qafqaz Albaniyası: Gecikmiş həqiqətlər”, “İrəvan – gizlədilmiş həqiqətlər”, “Zəngəzur”, “Qarabağ: Əcdadlarımızın mirası”, “Xocalı – bir millətin kədəri” və “Göyçə – itirilmiş ocaq” sənədli filmləri xüsusi yer tutur. Bundan başqa, “Qarabağ Atı” və “Mübariz İbrahimov” animasiya filmləri, eləcə də Şuşa, Laçın, Cəbrayıl, Qubadlı və Kəlbəcərə həsr olunmuş Azərbaycan və ingilis dillərində virtual səyahət layihələri vasitəsilə milli irsimizin və işğaldan azad edilmiş ərazilərimizin tanıdılmasına töhfə vermişik.
Bu təcrübə bizə göstərir ki, müasir informasiya texnologiyaları tarixi-mədəni irsin qorunması və təbliği, gənclərin maarifləndirilməsi, eləcə də Azərbaycan həqiqətlərinin beynəlxalq ictimaiyyətə çatdırılması baxımından geniş imkanlara malikdir. Rəqəmsal məzmun, sənədli filmlər, animasiya və virtual səyahətlər gənclərin diqqətini cəlb etməklə yanaşı, onların tarixi irsə marağının artırılmasına və məlumatların daha geniş auditoriyaya çatdırılmasına xidmət edir.
Təşkilatımız elmi və maarifləndirici tədbirlərin təşkilinə də xüsusi önəm verir. 2016-cı ilin may ayında “İrəvanın maddi və mənəvi irsi” adlı elmi-praktiki konfransın təşkilində yaxından tərəfdaşlıq etməyimiz bu istiqamətdə fəaliyyətimizin mühüm mərhələlərindən biri olub.
2023-cü ildə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Qərbi Azərbaycanın maddi və mədəni irsi mövzusunda” respublika elmi konfransını həyata keçirmişik. Həmin il Azərbaycan Gənclər Fondunun 17-ci qrant müsabiqəsi çərçivəsində “Qərbi Azərbaycan mövzusunda tələbə-gənclərlə interaktiv görüşlərin təşkili” layihəsini icra etmişik. 2024-cü ildə isə Azərbaycan Respublikası Gənclər və İdman Nazirliyinin qrant müsabiqəsi çərçivəsində “Gənclər arasında Qərbi Azərbaycanın tarixi və mədəni irsinin müasir informasiya metodları ilə təbliği” layihəsini reallaşdırmışıq.
2025-ci ildə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Ermənistanın toponimik cinayətləri” layihəsi çərçivəsində eyniadlı kitabın təqdimatı təşkil olunub. Bu layihələr tarixi yaddaşın qorunması, toponimlər və mədəni irs məsələlərinin ictimai müzakirəyə çıxarılması, eləcə də gənclərin bu mövzulara marağının artırılması baxımından əhəmiyyət daşıyır.
Bu gün Qarabağ və Şərqi Zəngəzurda aparılan bərpa və dirçəliş prosesi qarşımızda yeni vəzifələr qoyur. Böyük Qayıdış yalnız insanların doğma yurdlarına qayıtması deyil, həm də həmin ərazilərin sosial, iqtisadi, elmi, mədəni və ekoloji baxımdan inkişafıdır. Bu prosesdə gənclərin bilik və bacarıqlarından, yaradıcı potensialından və tədqiqat imkanlarından istifadə olunması xüsusi əhəmiyyət kəsb edir.
İnanırıq ki, tələbə-gənclərin Qarabağ və Şərqi Zəngəzurun tarixi, mədəniyyəti, təbii sərvətləri, ekoloji vəziyyəti və inkişaf perspektivləri ilə bağlı araşdırmalara cəlb edilməsi həm elmi düşüncənin inkişafına, həm də regionun gələcəyinə dair yeni ideyaların formalaşmasına kömək edə bilər. Universitetlər, elmi müəssisələr və vətəndaş cəmiyyəti təşkilatları arasında əməkdaşlığın genişləndirilməsi bu baxımdan mühüm istiqamətdir.
Bizim üçün əsas prioritetlərdən biri gəncləri yalnız məlumatlandırmaq deyil, onları araşdırmağa, öyrənməyə, elmi nəticələr hazırlamağa və əldə etdikləri bilikləri cəmiyyətlə bölüşməyə təşviq etməkdir. Tarixi-mədəni irsin rəqəmsal vasitələrlə təbliği, gənc tədqiqatçıların təşəbbüslərinin dəstəklənməsi və işğaldan azad edilmiş ərazilərin inkişafına dair elmi yanaşmaların təşviqi gələcək fəaliyyətimizin də mühüm istiqamətləri sırasında yer alır.
Əminəm ki, dövlət qurumları, universitetlər, qeyri-hökumət təşkilatları və gənclər arasında əməkdaşlığın gücləndirilməsi Qarabağ və Şərqi Zəngəzurun bərpası və dirçəlişi, Qərbi Azərbaycanın tarixi-mədəni irsinin tanıdılması, milli yaddaşın qorunması və Azərbaycan həqiqətlərinin beynəlxalq ictimaiyyətə çatdırılması işinə əlavə töhfələr verəcək.
Ölkədə bu maşınlardan şəxsi istifadə qadağan olunur
Vəzifəli şəxslərin xidməti maşınlarından istifadəsi ilə bağlı qanunvericiliyə dəyişiklik olunur. Elchi.az xəbər verir ki, bu, Milli Məclisin Hüquq siyasəti və...
