Azərbaycan Prezidenti İlham Əliyevin Özbəkistana dövlət səfəri tarixi əhəmiyyət kəsb edir.
Elchi.az xəbər verir, bunu Özbəkistan Xarici İşlər Nazirliyinin Hüquq departamentinin rəhbəri Əmir Sultanov bildirib.
“Vurğulamaq istərdim ki, biz, həqiqətən də, Azərbaycan Prezidentinin Özbəkistana misli görünməmiş tarixi səfərinin şahidi oluruq, bu səfər çərçivəsində çox mühüm sənədlər, sanballı ikitərəfli sənədlər paketi imzalanıb. Onlardan ən əsası isə dövlət başçılarının ölkələrimiz arasında çoxşaxəli əməkdaşlığın daha da möhkəmləndirilməsi və genişləndirilməsinə olan məqsədyönlülüyünü və qəti siyasi iradəsini təsbit edən Əbədi dostluq haqqında Müqavilə oldu”, – o bildirib.
Sultanov qeyd edib ki, səfər çərçivəsində mühüm iqtisadi sənədlər imzalanıb.
“Bu, ilk növbədə, ticarət dövriyyəsinin 1 milyard dollara qədər artırılması proqramı, həmçinin investisiya layihələrinin həyata keçirilməsi üzrə yol xəritəsidir. Bundan əlavə, demək olar, ən əsas belə sosial əhəmiyyətli sənəd iki ölkə vətəndaşlarının pensiya hüquqlarının təmin edilməsinə yönəlmiş pensiya təminatı haqqında saziş oldu”, – o bildirib.
Sultanovun sözlərinə görə, saziş pensiya təminatının konkret mexanizmlərini nəzərdə tutur.
“Bu sənəd iki ölkə vətəndaşlarına pensiyaların hesablanması, yenidən hesablanması və ödənilməsi üzrə konkret mexanizmləri nəzərdə tutur və nəticədə onların Özbəkistan və Azərbaycan Respublikası ərazisində əmək fəaliyyəti həyata keçirərkən pensiya hüquqları təmin edilir”, – o vurğulayıb.
