İsrail Baş naziri Binyamin Netanyahunun ABŞ Prezidenti Donald Trampın İsrail ordusunun Suriyanın cənubunda və Livanda, eləcə də Qəzza zolağında işğal etdiyi ərazilərdən geri çəkilməsi tələbini rədd edəcəyi iddia edilib.
Elchi.az xəbər verir ki, İsrailin 13-cü Kanal televiziyasının verdiyi məlumata görə, ABŞ-a yola düşməzdən əvvəl həftəlik kabinet iclasında Netanyahuya Vaşinqton administrasiyası İsrail ordusunun Livan, Suriya və Qəzza zolağında işğal etdiyi ərazilərdən geri çəkilməli olduğunu bildirib.
Xəbərdə Netanyahunun kabinet üzvlərinə “Mən buna qəti şəkildə qarşı çıxacağam və onlara “yox” deyəcəyəm” dediyi bildirilir. Həmçinin qeyd olunur ki, Təl-Əviv administrasiyası Beynəlxalq Təhlükəsizlik Yardım Qüvvələrinin (ISF) Qəzza zolağına daxil olmasını təsdiqləyib və ABŞ Prezidenti Donald Tramp İsrail ordusunun oradan geri çəkilməsini istəyir. 13-cü Kanala danışan mənbələr bildiriblər ki, Təl-Əviv administrasiyası İsrail ordusunun “Sarı Xətt” üzərində nəzarəti saxlayacağı və HƏMAS tamamilə tərksilah edilib Qəzza zolağından çıxarılana qədər geri çəkilməyəcəyi prinsipini qoruyub saxlayır.
Mənbələr bildirib ki, bu mərhələdə ISF-in yalnız Uqanda və Mərakeş kimi İsrailə dost ölkələrdən təxminən 200 nümayəndəsi var.
Mənbələr bildirib ki, İsrail kabineti “Beynəlxalq Təşkilatlar üçün İmmunitetlər” qanunu çərçivəsində ISF-ə toxunulmazlıq verilməsini təsdiqləyib və bu qüvvələrin İsrail ordusunun işğalından kənar ərazilərdə və ordu ilə tam koordinasiyada fəaliyyət göstərəcəyini vurğulayıb.
Bir rəsmi bildirib ki, “İstənilən ISF elementinin ölkəyə daxil olması baş nazirin, müdafiə nazirinin və xarici işlər nazirinin ayrıca təsdiqindən asılı olacaq. İsrail yalnız sülh müqavilələri olan və ölkəyə və ya onun rəsmilərinə qarşı beynəlxalq səviyyədə fəaliyyət göstərməyən dövlətlər arasından hansı ölkələrin qüvvə göndərə biləcəyini seçəcək”. Qəzzada atəşkəs müqaviləsinin 10 oktyabr 2025-ci ildə qüvvəyə minməsinə baxmayaraq, İsrail hücumlarını, dağıdılmasını və blokadasını davam etdirir. Qəzzanın təxminən 70%-ni işğal edən İsrail fələstinliləri ərazinin 30%-dən çox olmayan bir ərazi ilə məhdudlaşdırıb. Son media xəbərləri göstərir ki, Vaşinqton administrasiyası İsrailə Suriya, Livan və Qəzza zolağında işğal etdiyi ərazilərdən çıxmaq üçün təzyiq göstərir. Netanyahunun sabah Vaşinqtonda ABŞ prezidenti Donald Trampla görüşəcəyi bildirilib.
Şayəstə
