Türkiyənin Çanaqqala şəhərində 6–10 iyul tarixlərində keçirilən “Otizm ve Müzik Yaz Okulu” (“Autizm və Musiqi Yay Məktəbi”) beynəlxalq yay məktəbində Azərbaycanı Xətai rayonu 30 nömrəli Uşaq Musiqi Məktəbinin fortepiano ixtisası üzrə I sinif şagirdi, Altun Allahverdiyev (autizmli fərd) təmsil edib.
2021 – ci ildən etibarən mütəmadi olaraq təşkil olunan yay məktəbi əsasən autizm spektr pozuntusu olan fərdlərin musiqi vasitəsilə özlərini ifadə etmələrinin təşviqi, autizm sahəsində müasir elmi-praktik biliklərin paylaşılması, eləcə də inklüziv musiqi təhsilinin inkişafına töhfə verilməsi məqsədini daşıyır. Layihə Çanaqqala On Səkkiz Mart Universiteti başda olmaqla, bir sıra dövlət və özəl qurumların tərəfdaşlığı ilə həyata keçirilir.
Türkiyənin müxtəlif bölgələrindən autizm spektr pozuntusu olan iştirakçıların qatıldığı beynəlxalq yay məktəbində Altun Allahverdiyev beş günlük intensiv təlim proqramını uğurla başa vuraraq yekun konsertdə nümayiş etdirdiyi yüksək ifaçılıq bacarığı ilə diqqət çəkib. O, konsert proqramında İohann Ştraussun “Mavi Dunay” valsını və A.Babayevin “Nazəndə sevgilim” əsərini uğurla ifa edib.
Yay məktəbinin tədris proqramı çərçivəsində Altun Allahverdiyevin peşəkar inkişafına müəllimlər Ezgi Göksel və Tuba Bahar mentorluq ediblər. Təlim müddətində iştirakçılar fərdi və qrup məşğələlərində iştirak etməklə yanaşı, musiqi vasitəsilə ünsiyyət, yaradıcılıq və sosial bacarıqlarının inkişafına yönəlmiş müxtəlif fəaliyyətlərə cəlb olunublar.
Altun Allahverdiyevin bu beynəlxalq yay məktəbində uğurlu iştirakı autizm spektr pozuntusu olan uşaqların və gənclərin musiqi sahəsində potensialının üzə çıxarılması, onların inklüziv təhsil və beynəlxalq əməkdaşlıq mühitində fəal iştirakının təşviqi baxımından əhəmiyyətli nümunə kimi dəyərləndirilə bilər.
