NASA-nın yeni nəsil kosmik teleskopu olan Nensi Qreys Roman üçün geri sayım başladı. Təxminən 20 illik inkişaf, 4,3 milyard dollarlıq büdcə və yüzlərlə alim və mühəndisin səylərinin məhsulu olan teleskop, buraxılışından üç aydan az müddət əvvəl son hazırlıqlarını tamamlayır.
Elchi.az xəbər verir ki, yer kürəsindən təxminən 1,6 milyon kilometr məsafədə yerləşən bir nöqtədən kainatı müşahidə edən teleskop, yüz milyonlarla ulduzun və milyardlarla qalaktikanın panoramik görüntülərini çəkərək kosmosu xəritələşdirəcək.
Bu rəsədxana ilə NASA qaranlıq maddə və qaranlıq enerjinin sirlərini açmağı və Günəş sistemindən kənarda minlərlə yeni planet kəşf etməyi hədəfləyir.
Nensi Qreys Roma Kosmik Teleskopu səmanı əvvəlki bütün kosmik teleskoplardan daha geniş bucaq altında və yüzlərlə dəfə daha sürətli skan etmək qabiliyyətinə malikdir. NASA-nın Qoddard Kosmik Uçuş Mərkəzinin baş layihə alimi Culi MakEneri bildirib ki, Roman cəmi bir aylıq məlumat toplama müddətində Süd Yolunun əvvəllər araşdırılmamış bölgələrinə baxaraq qalaktikanın dərinliklərindəki ulduzları araşdıracaq. MakEneri əlavə edib ki, bu, hazırda mövcud olduğundan daha böyük bir astronomik kataloq yaradacaq. 1959-cu ildə NASA-nın ilk baş astronomu olan və “Hubble-ın anası” kimi tanınan Nensi Qreys Romanın adını daşıyan teleskop bu ayın sonlarında Floridadakı Kennedi Kosmik Mərkəzinə yola düşəcək. 30 avqustda buraxılması planlaşdırılan avtobus ölçülü rəsədxana SpaceX-in Falcon Heavy raketi ilə kosmosa aparılacaq.
Şayəstə
