FİFA Dünya çempionatları tarixində ən çox qol vuran futbolçuların siyahısına Almaniya millisinin sabiq hücumçusu Miroslav Kloze başçılıq edir.
Elchi.az xəbər verir ki, Kloze mundial karyerası ərzində 24 oyunda 16 qol vurub. O, 2002, 2006, 2010 və 2014-cü illərdə keçirilən dünya çempionatlarında Almaniya millisinin heyətində çıxış edib.
Siyahının ikinci pilləsində Braziliya millisinin əfsanəvi hücumçusu Ronaldo qərarlaşıb. “Fenomen” ləqəbli sabiq forvard dünya çempionatlarında 19 oyunda 15 dəfə fərqlənib.
Üçüncü sırada Almaniya futbolunun digər əfsanəsi Gerd Müller yer alır. O, cəmi 13 oyunda 14 qol vuraraq yüksək məhsuldarlıq göstəricisi ilə yadda qalıb.
Fransalı Just Fontaine və Argentina millisinin kapitanı Lionel Messi hərəyə 13 qolla növbəti pillələri bölüşürlər. Fontaine bu qolların hamısını 1958-ci il dünya çempionatında vurub. Bu göstərici hələ də bir mundialda vurulan ən çox qol rekordu olaraq qalır.
Messi isə 2022-ci ildə Qətərdə keçirilən dünya çempionatında Argentina ilə çempionluq qazanaraq ümumi qol sayını 13-ə çatdırıb. Onun aktivində dünya çempionatlarında 26 oyun var.
Braziliya futbolunun simvolu Pele və Fransa millisinin hücumçusu Kilian Mbappe hərəyə 12 qol vurublar. Mbappe aktiv futbolçular arasında bu siyahıda ən yüksək yerlərdən birindədir və 2026-cı il dünya çempionatında rekord yarışına qoşula bilər.
Siyahıda Almaniya futbolçularının çoxluğu diqqət çəkir. Kloze, Gerd Müller, Yurgen Klinsmann, Helmut Ran və Tomas Müller mundial tarixində ən azı 10 qol vuran oyunçular sırasında yer alırlar.
Dünya çempionatları tarixində 10 və daha çox qol vuran futbolçular belədir:
Miroslav Kloze – Almaniya – 16 qol
Ronaldo – Braziliya -15 qol
Gerd Müller – Almaniya – 14 qol
Just Fontaine – Fransa – 13 qol
Lionel Messi – Argentina – 13 qol
Pele – Braziliya – 12 qol
Kilian Mbappe – Fransa – 12 qol
Şandor Koçiş – Macarıstan – 11 qol
Yurgen Klinsmann – Almaniya – 11 qol
Helmut Ran – Almaniya – 10 qol
Qari Lineker – İngiltərə – 10 qol
Qabriel Batistuta – Argentina – 10 qol
Teofilo Kubilyas – Peru – 10 qol
Tomas Müller – Almaniya – 10 qol
Qjeqoj Lyato – Polşa – 10 qol.
