Milli Məclisin bugünkü plenar iclasında “Korrupsiyaya qarşı mübarizə haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının 2025-ci il 7 mart tarixli 150-VIIQD nömrəli Qanununun icrası ilə əlaqədar Azərbaycan Respublikasının bəzi qanunlarında dəyişiklik edilməsi haqqında Azərbaycan Respublikası qanununun layihəsi müzakirəyə çıxarılıb.
Elchi.az-ın məlumatına görə, müzakirələrdə komitə sədri Fazil Mustafa çıxış edib.
Bildirib ki, Azərbaycan futbolunda yaranan son vəziyyət investorların idmana marağına mənfi təsir göstərə və uzun illər ayrılan vəsaitlərin effektivliyinə dair ciddi suallar yarada bilər.
Fazil Mustafa qeyd edib ki, son günlər Azərbaycan futbolunda baş verən hadisələr ciddi narahatlıq doğurur. Bu mənada deputat Tovuzun “Turan” klubu ilə bağlı UEFA-nın verdiyi qərarı xatırladıb. Bildirib ki, iş adamı futbol klubuna milyonlarla vəsait yatırır, komanda nəticə qazanaraq Avropa yarışlarına vəsiqə əldə edir, lakin sonradan iştirakla bağlı problemlərlə üzləşir:
“İş adamı gedir, komandanı götürür, milyonlarla vəsait xərcləyir, Avropa kuboklarına vəsiqə qazanır, sonra məlum olur ki, bu komanda 10 il Avropada iştirak edə bilməz. Əgər bu barədə əvvəlcədən məlumat verilməyibsə, bu, çox ciddi məsələdir”.
Komitə sədrinin sözlərinə görə, belə hallar gələcəkdə idmana investisiya yatırmaq istəyən sahibkarların qərarlarına təsir göstərə bilər:
“Hansı iş adamı bundan sonra milyonlarla vəsait xərcləyib bir klub götürər, hansısa rayonda idman həyatını canlandırmağa çalışar?! Bu məsələlərə kiçik epizod kimi baxmaq olmaz”.
Deputat həmçinin vurğulayıb ki, futbol sahəsində şəffaflıq və idarəetmə məsələləri ayrıca diqqət tələb edir:
“Biz korrupsiya məsələlərinə yalnız hansısa dövlət qurumunda baş verən ayrıca hadisə kimi baxmamalıyıq. Bunun nəticəsi illərlə ayrılan vəsaitlərin səmərəliliyinə də təsir edir”.
Fazil Mustafa region ölkələri ilə müqayisələr də apararaq bildirib ki, legioner futbolçuların sayı baxımından Azərbaycan geri qalır:
“Özbəkistanın 60 legioner futbolçusu var, Gürcüstanın 120, Ermənistanın 40 futbolçusu müxtəlif ölkələrdə çıxış edir, ölkələrinə gəlirlər qazandırırlar. Azərbaycanın isə cəmi 9 futbolçusu xaricdə oynayır və onların böyük hissəsi yüksək səviyyəli futbol ölkələrində çıxış etmir. Bu, ölkəyə valyuta gətirmək, ölkənin nüfuzunu artırmaq deməkdir. Ona görə də futbol sahəsindəki problemlərə daha sistemli yanaşmaq lazımdır”.
Komitə sədri mini futbol üzrə Azərbaycan yığmasının Dünya və ikiqat Avropa çempionları olmasını nümunə olaraq çəkib. Bildirib ki, bu fakt bəzilərinin Azərbaycanın futbol ölkəsi olmadığı barədə iddialarına tutarlı cavabdır. (musavat)
