İran özünün zənginləşdirilmiş uranını Birləşmiş Ştatlara göndərmək əvəzinə, Rusiya tərəfinə təhvil verməyə razıdır.
Elchi.az xəbər verir ki, bu barədə Tehranın Vaşinqtonla münaqişənin həlli üçün yenidən işlənmiş razılaşma layihəsində deyilir və həmin hissələrdən “Al Hadath” televiziya kanalı sitat gətirib.
Telekanalın məlumatına görə, İranın təkmilləşdirdiyi layihədə İslam Respublikasının “müəyyən şərtlər daxilində zənginləşdirilmiş uranı ABŞ əvəzinə Rusiyaya təhvil verməyə” hazır olduğu qeyd edilir. Söhbətin konkret olaraq hansı şərtlərdən getdiyi barədə məlumat verilmir. Bundan əlavə, telekanalın bildirdiyinə görə, İran tərəfi müharibə zamanı dəymiş ziyanın ödənilməsi barədə ABŞ-a qarşı irəli sürdüyü tələbdən imtina edə bilər, lakin bununla belə, Tehran Vaşinqtondan “iqtisadi güzəştlər” əldə etmək niyyətindədir.
Həmçinin qeyd olunur ki, İran Oman və Pakistanın “Hörmüz boğazı ətrafında yaranacaq hər hansı münaqişədə mühüm rol oynamasını”, ABŞ ilə hər hansı potensial sazişə isə beynəlxalq birlik tərəfindən zəmanət verilməsini istəyir. Bunlardan başqa, “Al Hadath”a məlum olduğu kimi, Tehran “nüvə proqramı ilə bağlı problemi Hörmüz boğazı zonasında gəmiçilik məsələlərinin həllindən ayırmağa” çalışır və nüvə proqramının tamamilə ləğv edilməsi əvəzinə, onun “uzunmüddətli dondurulmasına” nail olmaq niyyətindədir.
Məryəm
