Azərbaycan Respublikası Elm və Təhsil Nazirliyi və Azərbaycan Respublikası
Mədəniyyət Nazirliyinin dəstəyi, Bakı Müasir Musiqi Cəmiyyətinin təşkilatçılığı ilə 18-24
may tarixlərində “4-cü Bakı Müasir Musiqi Günləri” Festivalı keçiriləcək.
Elchi.az xəbər verir ki. növbəti dəfə müasir musiqi sahəsində fəaliyyət göstərən yerli və xarici bəstəkar
və ifaçılar bir araya gələcək. Bu ilki festivalın da missiyası ölkəmizin dünya müasir
musiqi həyatında təmsilini gücləndirməkdir.
May ayının 18-dən 24-nə qədər davam edəcək festivalda proqrama daxil olan
XX-XXI əsr bəstəkarlarının əsərlərini həm yerli musiqi kollektivləri Cadenza orkestri,
BCMS ansamblı, solistlər, həm də nüfuzlu müasir musiqi ansamblları olan Catinblack,
C 2 E 2 Ensemble, eləcə də müxtəlif ölkələrdən dəvət olunmuş ifaçı solistlər və məruzəçilər
– Szilard Benes, Aleksey Potapov, Rachel Walker və b. ifa edəcək.
Festival proqramı səhər, günorta, axşam seanslarından ibarətdir və ictimaiyyətə
açıqdır. Proqram çərçivəsində Beynəlxalq Muğam Mərkəzi, Azərbaycan Musiqi
Mədəniyyəti Dövlət Muzeyi, Muzey Mərkəzi, Qara Qarayevin Ev Muzeyi kimi aparıcı
konsert zallarında həm peşəkar musiqiçilər, həm də müasir musiqi ilə maraqlanan hər
kəs üçün açıq olan vorkşoplar, mühazirələr, eləcə də axşam konsertləri keçiriləcək.
Proqram dünya premyeraları da daxil olmaqla, 40-a yaxın əsəri əhatə edir. İfa
olunacaq bəzi əsərlər xüsusi olaraq bu festival üçün yazılmışdır.
Bakı Müasir Musiqi Günləri Festivalının son günündə ənənəvi olaraq Azərbaycan
dilində subtitrlərlə hazırlanmış nüfuzlu dünya bəstəkarlarından biri olan Morton Feldman
haqqında film nümayişi olacaq. Bu tədbirə giriş üçün əvvəldən qeydiyyat tələb olunur
(yerlər məhduddur).
Festival haqqında daha ətrafı məlumatı rəsmi internet saytından və sosial şəbəkə
hesablarından (Facebook, İnstagram) əldə etmək olar.
