Azərbaycanın aqrar sənayesinin inkişaf tarixində peşəkarlığı, zəhməti və çoxillik fəaliyyəti ilə seçilən şəxslər xüsusi yer tutur. Belə insanlardan biri də ömrünün böyük hissəsini kənd təsərrüfatı məhsullarının emalı, qida sənayesinin inkişafı və keyfiyyət sistemlərinin formalaşdırılmasına həsr etmiş Xəlil Ələkbərovdur. İftixarla qeyd etmək olar ki, Xəlil Ələkbərovun keçdiyi şərəfli əmək yolu Azərbaycan kənd təsərrüfatı və emal sənayesinin inkişaf salnaməsində mühüm bir səhifə təşkil edir.
Xəlil Ələkbərov 40 il (1974–2014) Azərbaycan Kənd Təsərrüfatı Nazirliyi sistemində çalışmış, ölkəmizdə aqrarməhsullarının emal sənayesinin inkişafına böyük töhfələr vermişdir. Kənd təsərrüfatı məhsullarının istehsalı müəssisələrinin qurulub yaradılmasında yaxından iştirak edərək,ötən əsrin 70-ci və 80-ci illərində Azərbaycanın Sovetlər Birliyində meyvə-tərəvəz məhsullarının emal sənayesi üzrə aparıcı mövqelərə yüksəlməsində böyük xidmətlər göstərmişdir.
Xəlil Ələkbərov Sovet Azərbaycanının Meyvə-Tərəvəz Təsərrüfatı Nazirliyində müxtəlif rəhbər vəzifələrdə çalışdığı dövrdə ölkəmizdə konserv məhsullarının istehsalı müəssisələrinin, şərab istehsalı zavodlarının formalaşmasında, şərabçılıq məhsullarının ixrac qabiliyyətinin artırılmasında mühüm işlər görmüşdür. Ölkəmiz müstəqillik qazandıqdan sonra bu istiqamətdə fədakarcasına çalışmaqda davam edərək, Azərbaycan Respublikası Kənd Təsərrüfatı Nazirliyində ərzaq məhsullarının lisenziyalaşdırılması, keyfiyyət və standartlaşdırma sahələrinə rəhbərlik etmişdir. Azərbaycanda qida məhsullarının müasir keyfiyyət tələbləri əsasında istehsalıvə bitki mühafizəsi üzrə dünyanın qabaqcıl standartlarınınölkəmizə gətirilməsi, yeni keyfiyyət normativlərinin və standartların işlənib-hazırlanması, meyvə-tərəvəz məhsullarının emalı, konservləşdirilməsi və şərabçılıq sahələrində yeni texnologiyaların tətbiqi, şərab istehsalı zavodlarının yenidən qurulmasına müstəsna töhfələr vermişdir.
Azərbaycan müstəqillik qazandıqdan sonra Xəlil Ələkbərov ölkəmizdə fəaliyyəti dayandırılmış saysız-hesabsız istehsal müəssisələrinin, meyvə-tərəvəz istehsal edən konserv zavodlarının yenidən dirçəlməsi, şərabçılıq məhsullarının dünya ölkələrinə ixrac edilməsi məqsədilə müasir keyfiyyət göstəricilərində emal edilərək dünya bazarlarına çıxarılması prosesində dövlət dəstəyi çərçivəsində bir dövlət məmuru olaraq yaxından iştirak etmiş, istehsal müəssisələrində keyfiyyətə nəzarət laboratoriyaların qurulması, ixtisaslı texnoloqların yetişməsində yaxından iştirak etmişdir.
Xəlil Ələkbərov 15 may 1951-ci ildə anadan olub, 1969-1974-cü illərdə Azərbaycan Politexnik İnstitutunun Texnologiya fakultəsinin «Konservləşdirmənin texnologiyası» ixtisasında təhsil alıb. Təyinatla Xaçmaz rayonunun Xudat konserv zavoduna işləməyə göndərilib, 1974-cü ildən Xudat konserv zavodunda növbə ustası kimi əmək fəaliyyətinə başlayıb. Burada işlədiyi müddətdə növbə mühəndisi, növbə rəisi, direktor müavini, direktor vəzifələrinə qədər yüksəlib. 1980-ci ildə Xaçmaz rayonu rəhbərliyinin təqdimatı və Meyvə-Tərəvəz Təsərrüfatı Nazirliyinin əmri ilə Xaçmaz rayon Aqrar-Sənaye Birliyində sənaye emalı üzrə rəis vəzifəsinə təyin edilib. 1981-ci ildən 2014-cü ilədək Azərbaycan Kənd Təsərrüfatı Nazirliyinin mərkəzi aparatında və ölkəmizin bir sıra rayonlarında fəaliyyət göstərən konserv zavodlarında müxtəlif rəhbər vəzifələrdə çalışıb.
1980-1990-cu illərdə Nazirliyin rəhbərliyinin göndərişi əsasında Xaçmas, Sabiradab, Navahi, Lənkəran, Ağsu, Saatlı, Göyçay və digər rayonların konserv zavodlarına ezam edilərək, həmin müəssisələrdə istehsalat üzrə direktor vəzifələrini icra etmiş, Azərbaycanda ərzaq məhsullarının istehsalı və emalı üzrə yeni müəssisələrin, zavodların, istehsal prosesinin müasir texnologiyalar əsasında qurulub-yaradılması, keyfiyyətə nəzarət sistemlərinin tətbiqi və bu sahədə ixtisaslı texnoloqların yetişdirilməsi proseslərində bilavasitə iştirak etmişdir.
1993-1995-ci illərdə Kənd Təsərrüfatı Nazirliyi Aparatının Emal Sənayesi Baş idarəsində, 1995-1998-ci illərdə Kənd Təsərrüfatı Nazirliyi Aparatının Məhsulların keyfiyyəti və standartlaşdırma idarəsində, 1998-2007-ci illərdə Kənd Təsərrüfatı Nazirliyi Aparatının Ərzaq məhsullarının keyfiyyəti, standartlar və lisenziya idarələrində rəhbər vəzifələrdə işləmişdir.
Xəlil Ələkbərov dövlət orqanlarının struktur bölmələrində aparıcı və rəhbər vəzifələrdə çalışdığı müddətdə dövlətqulluğunda xidməti fəaliyyəti ilə fərqləndiyinə və ölkəmizdə kənd təsərrüfatı sahəsinin inkişafında verdiyi töhfələrə görə Azərbaycan Respublikasının “Dövlət Qulluğu haqqında” Qanuna müvafiq olaraq, Azərbaycan Respublikası Kənd Təsərrüfatı Nazirinin müvafiq əmrlərinə əsasən, dövlət qulluğunun kiçik müşaviri, daha sonra isə dövlət qulluğunun böyük müşaviri dərəcələrinə layiq görülmüşdür.
O, 2014-cü ildə təqaüdə çıxmasına baxmayaraq, ölkəmizin bir sıra dövlət qurumları tərəfindən dəvətlər alaraq, Azərbaycan Respublikasının Standartlaşdırma, Metrologiya və Patent üzrə Dövlət Komitəsi, Azərbaycan Standartlaşdırma və Sertifikatlaşdırma İnstitutunda məsləhətçi, ekspert-auditor,Azərbaycan Respublikasının Qida Təhlükəsizliyi Agentliyi, Azərbaycan Qida Təhlükəsizliyi İnstitutunda Hüquq və normativ tənzimləmə departamentində şöbə müdiri vəzifələrində işləmiş, uzun illərin təcrübəli kənd təsərrüfatı peşəkarı kimi bu sahələrin inkişaf etdirilməsində öz səylərini əsirgəməmişdir.
Xəlil Ələkbərovun ölkəmizdə kənd təsərrüfatının inkişafında çoxillik töhvələrinə, səmərəli əməyinə, fədakar zəhmətinə və misilsiz xidmətlərinə görə təşəkkür edir, onun 75 İllik Yubileyi münasibətilə ürəkdən təbrik edirik. Ona möhkəm can sağlığı, uzun ömür, məhsuldar əməyində yeni-yeni uğurlar arzulayırıq. Doğmalarının əhatəsində, hər zaman hörmət və izzətlə yaşamasını diləyirik.
