Britaniyanın kommunikasiya sahəsi üzrə tənzimləyici orqanı olan Ofcom, intihar mövzusuna həsr olunmuş onlayn forumun operatorunu 950 min funt-sterlinq (təxminən 1,28 milyon dollar) məbləğində cərimələyib.
Elchi.az xəbərinə görə, rəsmi bəyanatda bildirilir ki, tənzimləyici qurum yerləşdirilən məzmunun xarakterinə görə forumun və onun provayderinin adını açıqlamır. Ofcom-un məlumatına görə, bu xidmət Böyük Britaniyada 130-dan çox ölüm hadisəsi ilə əlaqəlidir.
Qurum müəyyən edib ki, platformada intiharı təşviq edən və ya ona şərait yaradan materiallar yerləşdirilib ki, bu da ölkədə cinayət məsuliyyəti yaradır. Söhbət xüsusilə həssas istifadəçilərə təsir göstərə biləcək təlimatlardan və müzakirələrdən gedir.
“Bu, cəmiyyətin ən həssas üzvlərini istismar etməsi ilə tanınan intihar forumu üçün əhəmiyyətli bir cərimədir”, — deyə Ofcom-un hüquq-mühafizə üzrə direktoru Süzanna Keyter bildirib.
Onun sözlərinə görə, provayderin Böyük Britaniyadan girişi məhdudlaşdırmaq üçün gördüyü tədbirlər qeyri-kafi olub: saytı hələ də VPN-siz açmaq mümkündür, bloklamalar isə ardıcıl şəkildə tətbiq edilmir.
Ofcom məlumat verib ki, 2025-ci ilin martından 2026-cı ilin aprelinə qədər davam edən araşdırma zamanı platformada mütəmadi olaraq qanunsuz məzmun aşkar edilib. Tənzimləyici həmçinin risklərin lazımi səviyyədə qiymətləndirilmədiyini və materialların silinməsi üçün görülən tədbirlərin səmərəsiz olduğunu qeyd edib.
Mərkəzi ofisi Böyük Britaniyadan kənarda yerləşən provayder 10 iş günü ərzində pozuntuları aradan qaldırmalıdır. Əks halda, Ofcom ölkədə foruma girişin tamamilə bloklanması tələbi ilə məhkəməyə müraciət etmək niyyətindədir.
Məryəm
