İran Prezidenti Məsud Pezeşkian Pakistan Ordusunun Qərargah rəisi Marşal Asim Munir ilə görüşündə bildirib ki, “Bu müharibə heç bir tərəfə fayda verməyəcək. ABŞ bu münaqişəni qazanmayacaq; əksinə, region və dünya ölkələri bunun bədəlini ağır ödəyəcək. Bu prosesdən qazanc əldə etməyə çalışan yeganə tərəf sionist rejimdir”.
Elchi.az xəbər verir ki, İran Prezidenti Məsud Pezeşkian rəsmi danışıqlar üçün Tehranda olan Pakistan Ordusunun Qərargah rəisi Marşal Asim Munirlə görüşüb. Görüşdə regional hadisələr, atəşkəs prosesi və ikitərəfli münasibətlər müzakirə olunub. Pakistanın atəşkəsə nail olunmasındakı roluna toxunan Pezeşkian Pakistanın vasitəçilik prosesinə verdiyi töhfələrə görə təşəkkür edib və bildirib ki, İran regionda davamlı sülh, sabitlik və qardaşlıq münasibətlərini dəstəkləyir və İran xalqının hüquqları beynəlxalq hüquq çərçivəsində qorunmalıdır.
İslam dünyasında regional sülh və birliyə vurğu
İslam dünyasında birliyin əhəmiyyətinə diqqət çəkən Pezeşkian dedi: “İran bütün İslam ölkələrini qardaş hesab edir. Bölgədəki müharibələr və qeyri-sabitlik əsasən sionist rejimin İslam ölkələri arasında bölünmə yaratmaq cəhdlərindən qaynaqlanır. Buna görə də İslam ümməti birlik və əməkdaşlıq içində hərəkət etməli və müsəlman torpaqlarının müsəlmanlara qarşı istifadəsinə icazə verməməlidir.”
Pezeşkian İslam ölkələri arasında birliyə nail olmağın bölgənin müharibəyə sürüklənməsinin qarşısını alacağını bildirərək əlavə etdi: “İslam ümmətinin birliyi bölgədəki böhranların həllində həlledici olacaq. Bu kontekstdə Pakistanın məsuliyyətli və qətiyyətli səyləri təqdirəlayiqdir. Digər İslam ölkələri də oxşar yanaşma tətbiq etməlidirlər.”
“İran qeyri-sabitlik axtarmır”
ABŞ və İsrailin İrana qarşı hücumlarına toxunan Pezeşkian dedi: “Ali liderimizin şəhid edilməsi, məktəblərin və xəstəxanaların dağıdılması, günahsız uşaqların və xalqımızın qətliamı hansı əsaslandırma və qanunla bu hücumların nəticəsi kimi izah edilə bilər? Vəzifəyə gəldiyimiz ilk gündən etibarən ABŞ və sionist rejim tərəfindən düşmənçilik və təxribatçı addımlar atılıb. Buna baxmayaraq, İran regionda qeyri-sabitlik axtarmır və qonşu ölkələrlə qardaşlıq münasibətləri inkişaf etdirmək istəyir.”
Şayəstə
