ABŞ Prezidenti Donald Tramp İran ətrafındakı gərginlik fonunda hərbi hazırlığın gücləndirildiyini bəyan edib və danışıqlar uğursuz olacağı təqdirdə güc tətbiqini istisna etməyib.
Elchi.az xəbər verir ki, o, bu barədə “The New York Post” qəzetinə müsahibəsində bildirib.
Onun sözlərinə görə, ABŞ hərbi gəmiləri indiyədək yaradılmış ən yaxşı silahla təchiz edilir.
“Biz gəmiləri indiyədək yaradılmış ən yaxşı silahla yükləyirik… Əgər razılaşma baş tutmasa, biz ondan istifadə edəcəyik və çox səmərəli şəkildə istifadə edəcəyik”, – Tramp vurğulayıb.
O qeyd edib ki, yaxın sutka ərzində İranla danışıqların uğurlu olub-olmayacağı aydın olacaq. “Biz təxminən 24 saatdan sonra, tezliklə aydın olacaq”, – o bildirib.
Xatırladaq ki, ABŞ və İsrail fevralın 28-də İrana qarşı hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb. Bundan sonra İran İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə müəyyən etdiyi hədəflərə zərbələr endirməyə başlayıb. Aprelin 8-də isə İran ilə ABŞ və onların müttəfiqləri ikihəftəlik atəşkəs barədə razılığa gəliblər.
Qeyd edək ki, ABŞ və İran danışıqları aprelin 11-də Pakistanda keçiriləcək.
