İranın xarici işlər naziri Abbas Əraqçi türkiyəli həmkarı Hakan Fidanla telefon danışığında guya Türkiyə tərəfə İran raketlərinin atılması barədə xəbərləri təkzib edib.
Elchi.az-ın məlumatına görə, İran Xarici İşlər Nazirliyinin bəyanatında bildirilir ki, Əraqçi “bəzi mənbələrin İrandan Türkiyə istiqamətinə raket atılması barədə məlumatlarını tamamilə əsassız adlandırıb və regionda sülh və dostluq düşmənləri tərəfindən həyata keçirilən ‘saxta bayraq əməliyyatlarının’ (false flag operations) təkrarlanması barədə xəbərdarlıq edib”.
Əraqçi qeyd edib ki, Tehran Türkiyə istiqamətinə mümkün raket atışları ilə bağlı Ankara ilə birlikdə araşdırma aparmağa hazırdır. “İran İslam Respublikası mehriban qonşuluq prinsipinə, Türkiyənin suverenliyinə və ərazi bütövlüyünə hörmətə sadiqdir və hər hansı mümkün iddiaları yoxlamaq üçün birgə texniki əməkdaşlığa hazırdır”, — deyə diplomat bildirib.
İran XİN rəhbəri bütün ölkələri “təcavüzkarların cinayətlərini, xüsusən də İslam Respublikasının məktəblərinə, universitetlərinə, elm mərkəzlərinə, tarixi və mədəni obyektlərinə, istehsal və enerji infrastrukturuna, eləcə də yaşayış məntəqələrinə hücumlarını pisləməyə” çağırıb.
Öz növbəsində Fidan “bu yaxınlarda İslamabadda Türkiyə, Pakistan, Səudiyyə Ərəbistanı və Misir xarici işlər nazirlərinin görüşündən danışaraq, region ölkələrinin müharibənin dayandırılmasına, sülh və sabitliyin bərqərar olmasına dəstəyini ifadə edib”.
Məryəm
