Hər il mart ayında keçirilən və dünyanın müxtəlif ölkələrindən rəqqasların qatıldığı nüfuzlu yarışda bu il Azərbaycanı xoreoqraf, “Baku Tango Therapy”nin təsisçisi və müəllimi Lenay Seidəli-zadə təmsil edib. O, tərəfdaşı — musiqiçi və tanqo müəllimi Yuriy Sedov ilə birlikdə çıxış edərək uğur qazanıb.
Elchi.az xəbər verir ki, cütlük tanqo nuevo kateqoriyasında ikinci yer tutaraq Dünya Kubokunun vitse-çempionu adına layiq görülüb və gümüş medal qazanıb.
Lenay Seidəli-zadə yarışla bağlı fikirlərini bölüşərək bildirib ki, hər bir müsabiqə rəqqas, idmançı və müəllim üçün mühüm inkişaf mərhələsidir. Onun sözlərinə görə, qalibiyyət isə tamamilə fərqli hisslər yaşadır:
“İlk növbədə Azərbaycanı təmsil edirsən, Bakının tanqo icmasının üzvü kimi məsuliyyət daşıyırsan. Öz adını və məktəbin nüfuzunu qoruyursan. Bu, çox qürurverici bir hissdir. Mənə dəstək olan hər kəsə minnətdaram”.
Rəqqas bu uğuru onu rəqs sənətinə sevdirən və ilk müəllimi olan nənəsinin xatirəsinə həsr etdiyini də qeyd edib.
Argentina tanqosu üzrə “TanGotoWorld Cup” dünyanın ən böyük tanqo festivallarından biri olan “TangoToIstanbul” çərçivəsində keçirilir. Festival 18 ildir ki, tanqo mədəniyyətinin inkişafı və beynəlxalq tanqo icmasının bir araya gəlməsi məqsədilə təşkil olunur və müxtəlif ölkələrdən tanınmış müəllimləri, musiqiçiləri və rəqqasları bir araya gətirir.
Qeyd edək ki, bu il Lenay Seidəli-zadə həmçinin festivalın rəsmi səfiri seçilib.
