Hörmüz boğazının faktiki bağlanması qlobal enerji təchizatını dayandırıb və ABŞ və İsrailin İrana hücumları neft qiymətlərini 14 ayın ən yüksək səviyyəsinə çatdırıb. Brent markalı neftin qiyməti ilk ticarətdə 13 faiz artıb.
Elchi.az xəbər verir ki, Yaxın Şərqdə hərbi gərginliyin artması qlobal enerji təchizatına və maliyyə bazarlarına birbaşa təsir göstərib. Həftəsonu hava əməliyyatlarından sonra dünyanın ən vacib su yollarından biri olan Hörmüz boğazının faktiki bağlanması neft qiymətlərinin son 14 ayın ən yüksək səviyyəsinə çatmasına səbəb olub. Günə aqressiv başlayan Brent markalı neftin qiyməti ilk ticarətdə 13 faiz artaraq barel üçün 82 dollara çatıb. Bazarlardakı qeyri-müəyyənlik investorları təhlükəsiz sığınacaqlara yönəltsə də, qızıl qiymətləri də yeni rekord həddə çatıb və 2,8 faiz artaraq unsiya üçün 5397 dollara çatıb.
Asiya bazarları həftəyə əhəmiyyətli itkilərlə başlayıb, Yaponiya Nikkei indeksi 2,4 faiz, Çin CSI 300 indeksi isə 0,6 faiz düşüb. Bu həftə Wall Street-in də mənfi şəkildə açılacağı gözlənilir. Dünya neft tədarükünün təxminən beşdə birinin keçdiyi Hörmüz boğazı, Tehranın bölgədəki gəmilərə keçidə və hücumlara icazə verməyəcəyi ilə bağlı xəbərdarlıqlarından sonra faktiki olaraq iflic vəziyyətinə düşüb. Dəniz nəqliyyatının monitorinq saytları hücum qorxusu və sığorta problemləri səbəbindən boğazın hər iki tərəfində onlarla tankerin gözlədiyini bildirir. Dünyanın ən böyük konteyner daşıma şirkətlərindən biri olan Maersk, təhlükəsizlik səbəbləri ilə həm Hörmüz boğazından, həm də Süveyş kanalından keçidi dayandırdığını açıqladı, Beynəlxalq Dəniz Təşkilatı isə bütün şirkətləri bölgədən uzaq durmağa çağırdı. Rystad Energy mütəxəssisləri gündə 15 milyon barel xam neftin bazara çatmasının qarşısının alındığını qeyd edərək, gərginliyin tez bir zamanda azalmaması halında neftin qiymətinin daha kəskin şəkildə yüksəlməsinin qaçılmaz olduğunu vurğulayırlar. ABŞ tərəfinin açıqlamaları göstərir ki, əməliyyatlar məqsədlərə çatana qədər həftələrlə davam edə bilər və bu da bazarlarda “uzunmüddətli böhran”la bağlı narahatlıqlara səbəb olur.
Şayəstə
