Ukrayna Prezidenti Volodimir Zelenski Rusiyanın Ukraynanın enerji infrastrukturuna yeni və genişmiqyaslı hücumlara hazırlaşdığını göstərən kəşfiyyat məlumatları aldıqlarını bildirib və xəbərdarlıq edib: “Hava hücumundan müdafiə düzgün qurulmalıdır. Hava hücumundan müdafiə raketlərinin tədarükündə hər hansı bir gecikmə hücumlardan daha çox ziyana səbəb olacaq. Münhendə müzakirə edilən hər şey tez bir zamanda həyata keçirilməlidir.”
Elchi.az xəbər verir ki, Ukrayna Prezidenti Volodimir Zelenski, Rusiyanın Ukraynanın enerji infrastrukturuna yeni və genişmiqyaslı hücumlara hazırlaşdığını göstərən kəşfiyyat məlumatları aldıqlarını bildirib və xəbərdarlıq edib: “Hava hücumundan müdafiə düzgün qurulmalıdır. Hava hücumundan müdafiə raketlərinin tədarükündə hər hansı bir gecikmə hücumlardan daha çox ziyana səbəb olacaq. Münhendə müzakirə edilən hər şey tez bir zamanda həyata keçirilməlidir.”
Ukrayna Prezidenti Volodimir Zelenski sosial media hesabında paylaşdığı video mesajda Rusiya ilə davam edən müharibə ilə bağlı qiymətləndirmələr edib. Zelenski Rusiyanın Ukraynanın enerji infrastrukturuna yeni və genişmiqyaslı hücumlara hazırlaşdığını göstərən kəşfiyyat məlumatları aldıqlarını bildirib və əlavə edib: “Hava hücumundan müdafiə düzgün qurulmalıdır. Bunlar tərəfdaşlardan xüsusi qorunma və müvafiq dəstək tələb edən birləşmiş hücumlardır. Hava hücumundan müdafiə raketlərinin tədarükündə hər hansı bir gecikmə hücumlardan daha çox zərərə səbəb olacaq. Münhendə müzakirə edilən hər şey tez bir zamanda həyata keçirilməlidir. Tərəfdaşların laqeyd qalmaması vacibdir.”
“Tərəfdaşlarımız hərəkətə keçməlidirlər”
Zelenski Ukraynanın danışıqların davam etməsini gözlədiyini, lakin Rusiyanın qışın son günlərindən istifadə edərək Ukraynaya yeni zərbələr endirmək istədiyini söyləyib və əlavə edib: “Biz ABŞ-ın qeyd-şərtsiz və uzunmüddətli atəşkəs təklifi də daxil olmaqla, bütün real təklifləri qəbul etdik. Rusiya bunu rədd edir və cəbhə xəttində, şəhərlərimizdə və enerji infrastrukturumuzda hücumlarını davam etdirir.” “Tərəfdaşlarımızın təcavüzkarı sülhə məcbur etmək üçün hərəkətə keçməsini gözləyirik”, – deyə o bildirib.
Zelenski Rusiyaya qarşı sanksiyalara çağırır
Rusiyanı müharibəyə son qoymağa məcbur etmək üçün yeni sanksiyalar hazırlayan bütün tərəfdaşlarına təşəkkür edən Zelenski dedi: “Biz Avropadan, Böyük Britaniyadan, Kanadadan və digər tərəfdaşlardan güclü qərarlar gözləyirik. Bu qərarlar əslində artıq hazırdır.” Ukraynanın bu yaxınlarda Rusiyanın işğal cəhdini dəstəkləyən rusiyalı idmançılara qarşı sanksiyalar tətbiq etmək qərarına gəldiyini xatırladan Zelenski əlavə etdi: “Rusiyanın təcavüzünə qoşulan və kömək edən hər kəsin dünyada sərbəst hərəkət edə bilməməsini təmin etmək üçün tərəfdaşlarımızla əməkdaşlıq edəcəyik.” O dedi: “Ümid edirik ki, tərəfdaşlarımız bütün bu sanksiyaları tətbiq etmək üçün lazımi siyasi iradə nümayiş etdirəcəklər.”
“ABŞ ilə enerji tərəfdaşlığı ilə bağlı irəliləyişlər var”
Ukraynanın bərpası üçün maliyyə yardımı, avadanlıq və zəruri malları əhatə edən dəstək paketləri barədə ilkin razılaşmaların əldə edildiyini xatırladan Zelenski dedi: “Bu həftə Fransa enerji üzrə “Ramşteyn” görüşünə ev sahibliyi edəcək. G7 nümayəndələri və G7 üzvü olmayan, lakin bizə əhəmiyyətli dəstək verən Avropa ölkələri də görüşdə iştirak edəcəklər. Kömək etməyə hazır olduqlarına görə minnətdaram.” ABŞ ilə enerji sahəsində də işləməyə davam etdiklərini vurğulayan Zelenski, “Ukrayna və ABŞ arasında strateji enerji tərəfdaşlığının qurulması istiqamətində irəliləyişlər var. Bu, çox vacibdir. Avropa ilə bağlı da vacib irəliləyişlər var. Bu da çox vacibdir” dedi.
“Rusiya hərəkətlərinə görə məsuliyyət daşımalıdır”
Zelenski Ukraynanın Avropa və Avroatlantik təhlükəsizliyinin vacib elementinə çevrilə biləcəyini vurğuladı. Tərəfdaşların Ukraynanın imkanlarını anlamasının vacibliyini vurğulayan Zelenski, “Heç kim özünü aldatmasın: Rusiya təcavüzünə görə məsuliyyət daşımasa, sizinlə və ya onunla əməkdaşlıq etməyi gözləyən dünyada heç kimlə sülh içində yaşamayacaq. Rusiya etdiyi hər şeyə görə məsuliyyət daşımalıdır. Ədalət zəfər çalmalıdır” dedi. Zelenski Ukrayna təhlükəsizlik qüvvələrini və Kiyev hökumətini dəstəkləyən bütün tərəfdaşlara təşəkkür etdi.
Şayəstə
