ABŞ dövlət katibi Entoni Blinken Çinlə münasibətlərdə rəqabətin və gərginliyin artdığı bir dövrdə kommunikasiya kanallarını açıq saxlamaq və problem və fikir ayrılıqlarını idarə etmək üçün mexanizmlər yaratmaq məqsədi ilə Pekinə səfər edir.
Elchi.az xəbər verir ki, iki günlük rəsmi səfər üçün bu gün səhər saatlarında Çinin paytaxtına gələn Blinken bu gün həmkarı Qin Gang və Çinin ən yüksək səviyyəli diplomatı, Kommunist Partiyası Mərkəzi Xarici Əlaqələr Komissiyası Ofisinin direktoru Vanq Yi ilə görüşəcək. Blinkenin sabah prezident “Xi Jinping” ilə görüşəcəyi gözlənilir.
Blinken ABŞ prezidenti Co Baydenin 2021-ci ilin əvvəlində vəzifəyə başlamasından bəri Pekinə səfər edən ən yüksək vəzifəli məmur və son 5 ildə Çinə səfər edən ilk ABŞ dövlət katibidir. Sonuncu dəfə Donald Trampın dövlət katibi Mayk Pompeo Pekinə səfər edib.
ABŞ və Çin arasında daha yaxşı ünsiyyət kanallarının qurulmasının vacibliyinə işarə edən Blinken, yola düşməzdən əvvəl verdiyi açıqlamada, “Biz Çinlə rəqabətin qarşısı alına bilən anlaşılmazlıqlar səbəbindən münaqişəyə çevrilməməsinə əmin olmaq istəyirik. Nə qədər aydın ünsiyyət qura bilsək, anlaşılmazlıqlardan və ünsiyyət xətalarından daha asan qaça bilərik”,-deyib.
ABŞ-lı nazir Pekinə Çin və ABŞ arasında iqtisadi və strateji rəqabətin artdığı, cari problemlərin və gərginliyin həll edilmədiyi, qarşılıqlı inamsızlığın hökm sürdüyü bir vaxtda səfərdədir.
İki ölkə arasında Tayvan məsələsindən tutmuş suverenlik mübahisələrinə və Cənubi dənizdəki hərbi gərginliyə, iqtisadi və strateji rəqabətdən ABŞ-ın Çinə texnoloji məhdudiyyətlər qoymasına və insan haqları məsələlərinin tənqidinə qədər bir çox problemli sahələr var.
Blinkenin səfəri zamanı tərəflərin problemli sahələrlə bağlı mövqelərini təkrarlayacağı gözlənilir, lakin həll üçün hər hansı sahədə konsensusun əldə olunacağı gözlənilmir. Bununla belə, səfər hava şar böhranından sonra kəsilən diplomatik ünsiyyətin bərpası istiqamətində son aylarda atılan addımların son həlqəsi kimi mühüm əhəmiyyət kəsb edir.
Nuranə Məmmədova
Son şərhlər