“Rusiyanın Ukraynaya hücumuna “oturduğu budağı kəsən adam” epitetini uyğun görsək, yanılmarıq. Rus tarixinin ən düşüncəsiz hərəkətini edən rus idarəçiləri artıq öz potensiallarını tükədib. Dünyanın ən zəif siyasətçisi Rusiyanın başında olsa idi bu hərəkəti etməzdi”.
Bu fikirləri Elchi.az-a açıqlamasında politoloq Azər Qasımov deyib.
Müharibənin altıncı ayının başa çatdığını söyləyən politoloq artıq rolların dəyişdiyini bildirib:
“Bir neçə ay öncə Rusiyanın hərbi uğur əldə edəcəyini gözləyirdilərsə, indi prosesin tam əksi gedir. Rusiya ordusu da idarəçiləri kimi bütün potensialını tükədib. Ukrayna ordusu edə bilməz deyilənləri etməyə başlayıb.
Krımın vurulmasının söhbəti gedəndə Medvedyevin buna nüvə zərbəsi ilə hədə gəldiyi hara, indi hücumların hərəsinə bir ad qoyub, siqaretdən ehtiyatsız davranma, naməlum səbəbdən partlama filan deyən Rusiya hara?
Kerç körpüsünə hücum etməyə risk etməyən Ukrayna ordusu artıq körpüyə zəif raketlə zərbə endirməklə bu addımı atmağa hazır olduğunu mesaj verib və Kerç körpüsünün qanunsuz tikildiyini bildirib.
Ukrayna ordusu Xerson istiqamətində əks hücumu davam etdirir. Rus ordusunun tükədiıməsi davam edir. Xerson şəhərinin geri alınması müharibənin gedişində dönüş olacaq. Bu, Rusiyanın informasiya propaqandasını da çökdürəcək. Rus silahı və ordusunun gücü mifini məhv edərək, onun “yük 200″ tabutuna sonuncu mismarı çaxacaq”.
Yeganə
Son şərhlər