“Ukrayna Qara dənizdəki qeyri-qanuni fəaliyyətlərə, hərbi cinayətlərə və xüsusən də dəniz minalarından Qara dənizdə nəzarətsiz şəkildə qeyri-qanuni silah kimi istifadəyə görə Rusiyanı beynəlxalq məsuliyyətə cəlb etməkdə israr edir”.
Elchi.az xəbər verir ki, bu barədə Ukrayna XİN-in yaydığı bəyanatda bildirilib.
Bəyanatda qeyd olunub ki, Rusiya Ukraynaya qarşı genişmiqyaslı müharibəyə başlayandan bəri “Qara dənizdə hərbi dəniz qüvvələrinin qeyri-qanuni fəaliyyətini artırıb”.
“Rusiya mülki dəniz gəmilərini ələ keçirib məhv etməklə, dənizdən Ukrayna ərazisini bombalamaqla yanaşı, dəniz quldurluğunun yeni üsulundan istifadə edir – dəniz minalarından nəzarətsiz üzən sursat kimi istifadə edir. Məhz bu üzən minalar 2022-ci il martın 26-28-də Türkiyə və Rumıniya sahillərində tapılıb”, – XİN-dən bildirilib.
XİN-in bəyanatında qeyd edilib ki, araşdırmaların nəticəsinə görə, bu minalar 2022-ci ilin əvvəlində Ukrayna Silahlı Qüvvələrinin Hərbi Dəniz Qüvvələrində qeydiyyata alınmayıb.
“Bu minalar Rusiya silahlı qüvvələri tərəfindən 2014-cü ildə Ukraynanın Sevastopol şəhərinə hərbi müdaxilə və şəhərin müvəqqəti işğalı zamanı ələ keçirilib. Buna görə də Rusiya 2014-cü ildə ələ keçirilən dəniz minalarından istifadə edərək, Ukraynaya qarşı məqsədli şəkildə təxribat törədir və beynəlxalq tərəfdaşlar qarşısında gözdən salmağa çalışır.
Ukrayna Xarici İşlər Nazirliyi vurğulayır ki, Rusiyanın üzən dəniz minalarından qəsdən istifadə etməsi bu minaları faktiki olaraq ayrı-seçkilik qoyulmadan istifadə edilən silaha çevirir və bu, ilk növbədə, Qara və Azov dənizləri, həm də Kerç və Qara dəniz boğazlarında mülki naviqasiyanı və dənizdəki insan həyatını təhlükə altında qoyur”.
Ukrayna XİN bəyan edib ki, üzən dəniz minalarından istifadəyə, habelə onların gözlənilməz nəticələrinə görə məsuliyyət yalnız Rusiya Federasiyasının və onun dəniz qüvvələrinin üzərinə düşür.
XİN-dən o da bildirilib ki, Ukrayna beynəlxalq öhdəliklərinə sadiq qalaraq Rusiyanın Qara dənizdə üzən minalardan istifadə etməsi ilə bağlı Beynəlxalq Dəniz Təşkilatına xəbərdarlıq edib, habelə beynəlxalq tərəfdaşlar məlumatlandırılıb.
Son şərhlər