“Elchi.Az” xəbər verir ki, Ərdoğan tədbirdə çıxış edib. Çıxışı zamanı bir çox məsələlərə toxunan dövlət başçısı dünyada İslam ölkələrinin xüsusi yer tutduğunu deyib. Onun sözlərinə görə, müsəlman ölkələri arasında Türkiyənin xüsusi yeri var.

“Türkiyə İslam dünyasında sülhün bərqərar olmasına çalışır. Bizi bu yoldan heç kim döndərə bilməz. Nə terror, nə də onlara dəstək verən güclər Türkiyəni məhv edə bilməyəcəklər. Onlar Türkiyəni zəiflədə, uçuruma apara bilməyəcəklər”, – deyə Ərdoğan vurğulayıb.

Ərdoğan həmçinin qeyd edib ki, müsəlman ölkələrindən qaçqın olan insanlara da həmişə dəstək olacaq: “Türkiyədə 3 milyondan artıq suriyalı və iraqlı qaçqın var. Dünya dövlətləri 725 milyon dollarlıq dəstək verib. Türkiyə isə bu işə ümumilikdə 30 milyarda yaxın məbləğdə dollar sərf edib. Başqa ölkələrdən dəstək gəlsə də, gəlməsə də, biz bu işimizi davam etdirəcəyik”.

Ərdoğan eyni zamanda bildirib ki, əslində Suriyada baş verənlər insanlıq üçün utancverici haldır: “Həqiqətdə Suriya və suriyalılar deyil, bütün dünya məhv olur. Oradakı haqsızlıqlar dünya ölkələri üçün təhdiddir. Biz bu təhdidin qarşısını alacağıq. Biz çox danışmağa deyil, çox iş görməyə üstünlük veririk”

Çıxışdan sonra Ərdoğan suriyalı qaçqınlarla birgə iftar süfrəsində əyləşib. Ərdoğanın çıxışı suriyalılar üçün ərəb dilinə tərcümə edildi.