Artıq bir neçə gündür ki, ölkənin əksər bölgələrinə, o cümlədən də paytaxt Bakıya intensiv qar yağmağa başlayıb. Kəskin hava şəraiti ilə əlaqədar körpü və tunellərdə nəqliyyat vasitələrinin hərəkətlərində sıxlıq yaşanıb. Bəzi avtomagistral yolların hərəkət hissəsinin qarla örtülməsi səbəbi ilə sürət həddi enidirilərək 60 km/ saat müəyyən edilib.
Qeyd edək ki, yağan qar daha çox paytaxtın şimal hissəsində olan ərazilərinə yağıb. Bakının cənub qurtaracağında, xüsusən də Xətai rayonu, Əhmədli qəsəbəsinə qar yağıntısı nisbətən xeyli az olub. Bu da şəhər sakinləri arasında çaşqınlıq yaradıb. Onu da qeyd edək ki, ötən ilin noyabr ayında da bu cür hal yaşanmışdı. Şəhərin bir tərəfinə qar yağdığı halda, digər tərəfi quru və yağmursuz olmuşdu. Bəziləri bu cür halların iqlim şəraiti ilə əlaqədar olduğunu iddia edir. Bəs səbəb nədir, niyə qar Bakının qəsəbə və rayonlarına müxtəlif miqdarda düşür? Bu normal haldır yoxsa?…
Milli Ekoloji Proqnozlaşdırma Mərkəzinin rəhbəri Telman Zeynalov “Yeni Müsavat”a açıqlama verərək məsələyə aydınlıq gətirib. Ekspert qeyd edib ki, bu cür hava prosesi küləyin əsmə hərəkətindən asılıdır:
“Bu, buludlarla əlaqəlidir və külək axınından asılıdır. Külək hansı tərəfdən əsirsə, buludları da o tərəfə qovur. Əhmədli tərəfdə külək yox idi, külək Şamaxı tərəfdən gəlib Bakının üzərindən Yasamal rayonuna keçib və bir də daha çox Xırdalan rayonunda tutub. Buna görə də ora həddən artıq qar yağıb. Əslində o demək deyil ki, qar yağanda hər tərəfə eyni qaydada yağmalıdır, xeyr, qeyd etdiyim kimi bu məsələ küləyin istiqamətindən, buludlardan asılıdır. Hətta ola bilər ki, külək Əhmədli tərəfdən də keçsin, amma oranı tutmasın. Bəzən elə olur ki, şəhərin mərkəzinə qar yağır, amma həmin bölgə quru olur, hətta yağış da yağmır. Bunu hansısa iqlim şəraiti ilə əlaqələndirmək doğru deyil. Hazırda qışdır və bu normal haldır.
Bir neçə gün əvvəl məndən soruşurdular ki, “Bakıda niyə havalar isti, quraqlıq keçir, yağış yağmır?” İndi deyirəm ki, ötən gün yağan qar iki aylıq normanı 4 saat ərzində tökdü yerə. Əgər Abşeron yarımadasına yağıntının miqdarı 250 mm-sə, bu, təxminən gəlib çıxır 2 sm qar yağıntısına, amma həmin gün o bölgədə 4 sm qar var idi. Yəni iki aylıq norma doldu”.
“Qarşıda bizi daha sərt soyuq hava gözləyirmi” sualımıza isə Telman Zeynalov bu cür cavab verdi:
“Xeyr. Bizdə ən soyuq hava şəraiti adətən fevral ayında müşayiət olunur, təxminən 15-20-si tarixlərinə qədər. Ayın 20-dən sonra havalar mülayimləşməyə başlayır. Amma əgər şimal küləyi əsərsə, fevral ayında hava daha soyuq ola bilər. Bunun da nə qədər davam etməsi küləyin istiqamətindən asılı olacaq. Amma indiki məqamda hələ ki daha sərt soyuq gözlənilmir, ola bilsin ki, temperatur 2-3 dərəcə azalsın, amma bundan çox olmayacaq”.
Qeyd edək ki, Ekologiya və Təbii Sərvətlər Nazirliyinin Milli Hidrometeorologiya Departamenti fevral ayına olan hava proqnozunu açıqlayıb. Məlumatda bildirilib ki, fevral ayında havanın orta aylıq temperaturu və aylıq yağıntının miqdarının əsasən iqlim normasına yaxın olacağı gözlənilir. Bakıda və Abşeron yarımadasında orta aylıq temperaturun 4-6 dərəcə isti (gecələr 0-5 dərəcə isti, bəzi günlərdə 3-8 dərəcə şaxta, gündüzlər 7-12 dərəcə isti, bəzi günlərdə 2 dərəcə şaxtadan 3 dərəcəyədək isti) olacağı gözlənilir ki, bu da iqlim normasına yaxındır.
Son şərhlər