“Evimdəyəm” deyən sabiq nazir haqda şok xəbərlər; Barəsində cinayət işi açılması barədə xəbəri təkzib edən sabiq nazir özünə niyə vəkil tutub?; vaxtilə iqtidarda ən fağır nazir kimi tanınsa da, Əli Abbasov vurduğu ziyanı ödəmək istəməyib, üstəlik mülklərini gizli satışa çıxarıb
Ötən ilin noyabr ayının 13-də prezident İlham Əliyevin sərəncamı ilə işdən qovulan rabitə və yüksək texnologiyalar naziri Əli Abbasov barəsində cinayət işi açılıb. “Trend”in məlumatına görə, sabiq nazirlə bərabər nazirliklə əməkdaşlıq edən bir neçə şirkətin nümayəndələri barəsində ayrıca cinayət işi başlanıb.
Ə.Abbasov və digərləri Cinayət Məcəlləsinin 179.3.1-ci (mənimsəmə və ya israf etmə, mütəşəkkil dəstə tərəfindən törədildikdə), 179.3.2-ci (mənimsəmə və ya israf etmə, külli miqdarda törədildikdə), 29, 179.3.1-ci (mənimsəmə və ya israf etməyə cəhd, mütəşəkkil dəstə tərəfindən törətməyə cəhd), 29, 179.3.2-ci (mənimsəmə və ya israf etməyə cəhd, külli miqdarda törətməyə cəhd), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə təqsirləndirilirlər.
Milli Təhlükəsizlik Nazirliyində kök salmış cinayətkar dəstə ifşa olunduqdan dərhal sonra Rabitə və Yüksək Texnologiyalar Nazirliyində ən yaxın adamlarının həbsi 11 ildir nazir kürsüsündə oturan Ə.Abbasovun da sonunu gətirdi. Məlum oldu ki, nazirlikdə telefon danışıqlarının MTN tərəfindən qanunsuz dinləmələrinə xüsusi şərait yaradılıb, Eldar Mahmudovun yaxın adamları və qohumlarından ibarət “rabitəçi çetesi” külli miqdarda dövlət əmlakını mənimsəyib.
MTN-dəki general mafiyasının fəaliyyəti üçün lazımi texniki dəstəyi göstərən rabitəçilər, üstəlik, hər ay Eldar Mahmudova 10 milyon manat “xərac” da ödəyiblər ki, bunu da dövlətdən oğurlayaraq, həyata keçiriblər.
Yoxlamaların ilk günlərində Ə.Abbasov israrla həm özünü, həm də yaxın adamlarını müdafiə edirdi. Nazirliyin aparat rəhbəri Vidadi Zeynalov başda olmaqla, Beynəlxalq Əlaqələr və Hesablaşmalar Mərkəzinin direktoru Cəlil Cəfərov, “Bakı Telefon Rabitəsi” İstehsalat Birliyinin baş direktoru Beytulla Hüseynov, “Aztelekom” MMC-nin baş direktoru Məmməd Məmmədov, “Azərpoçt” MMC-nin baş direktoru Qəmbər Bəybalayev, “Optik Rabitə, Tikinti və Quraşdırma” MMC-nin direktoru Namazalı Məmmədov, “Aztelekom” MMC-nin baş mühasibi Oktay Rüstəmov kimi yüksək vəzifəli şəxslər həbs olunduqdan sonra isə Ə.Abbasov susmağa üstünlük verdi.
2015-ci ilin noyabr ayının 13-də işdən çıxarıldıqdan sonrakı günlərdə isə o, bütün məsuliyyəti həbs edilənlərin üzərinə “yükləməklə” Şüvəlanda yerləşən bağ evinə qapandı. Xəbərlər vardı ki, hələ o zamandan sabiq nazir haqda “heç yerə getməmək” barədə qətimkan tədbiri seçilib, nazirlikdəki korrupsiya faktları və MTN-in həyata keçirdiyi gizli dinləmələrlə bağlı bir neçə dəfə istintaqda ifadə də verib.
10-dək ən yaxın kadrı korrupsiya ittihamı ilə həbsdə olan Ə.Abbasov tezliklə “müdafiə taktikasını” dəyişdi, hücuma keçdi. Bütün mənimsəmə sənədlərində imzası və ya razılığı olan Ə.Abbasov ən yaxın adamı olan V.Zeynalovun “onu satmasını” şantaj kimi qiymətləndirdi. Dövlət başçısı İlham Əliyev nazirlikdəki korrupsiya faktını “ vicdansızlıq və xəyanət” kimi qiymətləndirdikdən sonra YAP-ın Siyasi Şurasından səs-küysüz uzaqlaşdırılan Ə.Abbasovu Azərbaycan Dövlət İqtisad Universitetində rəhbəri olduğu kafedra müdirliyindən də çıxardılar.
Respublika Prokurorluğu 10 ay davam edən istintaqdan sonra “rabitə çetesi”nin işini yekunlaşdıraraq bu ayın əvvəlində məhkəməyə göndərib. Məhz bu ərəfədə Ə.Abbasov barəsində cinayət işinin açılması barədə yayılan xəbər dərhal elektron mediada günün manşetinə çevrilib.
Hakimiyyətə yaxın “Trend” agentliyinin məlumatından sonra isə Ə.Abbasov APA-ya qısa açıqlama verib. Sabiq nazir deyib ki, barəsində cinayət işi başlanmayıb, yayılan xəbərlər həqiqəti əks etdirmir və dezinformasiyadır. O, hazırda evində olduğunu da əlavə edib.
Ə.Abbasovun açıqlaması əslində daha çox cinayət işinin açılmasının deyil, həbs edilmədiyinin təkzibidir. Ə.Abbasovun həbs edildiyini heç kim iddia etməyib və o həqiqətən də evindədir. Üstəlik, onun xəstəliklə bağlı müraciətinə baxmayaraq, bir ilə yaxındır ki, ölkədən kənara buraxmırlar.
Daha maraqlı bir məqam Ə.Abbasovun özünə vəkil tutmasıdır. Cinayət işi barədə xəbəri ilk təkzib edən də onun vəkili Kamandar Nəsibov olub: “Bu yalan və əsassız xəbərdir. Arxasında hansısa maraqlar dayanır. Əli Abbasov barəsində cinayət işi yoxdur”, deyən, vəkil təəssüf ki, niyə sabiq nazirlə müqavilə bağladığını açıqlamayıb. Məntiqlə heç bir cinayətdə suçlanmayan, istintaqa çağırılmayan Ə.Abbasovun vəkilə ehtiyacı olmamalıdır.
“Yeni Müsavat”ın məlumatına görə, Ə.Abbasov işdən çıxarılandan bir müddət sonra vəkillərlə (başqa vəkillər də var) müqavilə bağlayıb. Onun əmlak işləri üzrə də vəkili olduğu iddia edilir.
Ə.Abbasovun vəkilinin “hansısa maraqlar” ifadəsi də diqqət çəkir. 11 aydır nəzarət altında saxlanılan Ə.Abbasov iqtidarda ən fağır nazir kimi tanınıb. Onun nazir olduğu dövrdə iqtidardan kimlərləsə çəkişməsi barədə məlumat olmayıb. “Fağır nazir” “xəyanət və vicdansızlıq” ittihamı ilə kürsüsündən atılıb və yalnız bu əməllərinə görə hədəf ola bilər.
Məlumatlar var ki, işdən çıxarılandan sonra “özündən başqa hamını satan” sabiq nazir dövlətə vurduğu ziyanı ödəmək istəmədiyi üçün cəzalandırılır. Belə ki, həbsdə olanlar, xüsusilə “sağ əli” Vidadi Zeynalov mənimsənilən vəsaitin (söhbət 100 milyonlardan gedir) böyük hissəsinin sabiq nazirə çatdığını bildirib. Ə.Abbasova ölkədən çıxış qadağası qoyduqdan sonra ondan mənimsənilən pulları geri qaytarmaq tələb olunub. Ə.Abbasov əvvəl razılaşsa da, sonradan “mən müəllim adamam” deyib dövlətə vurduğu ziyanı ödəməkdən imtina edib. İddia olunur ki, Ə.Abbasov, üstəlik, Bakıdakı mülklərini də başqa adamların adı ilə satışa çıxarıb. Sabiq nazir əvvəl metronun “Gənclik” stansiyası yaxınlığındakı – “Zivella” mağazasının arxasındakı vaxtilə bir orta ranqlı iş adamından dəyərindən 10 dəfə az qiymətə aldığı 12 sot ərazini satıb. Həmin mülk Ə.Abbasovun Eldar adlı oğlunun adına olub. Dəyərindən az – 1,5 milyon manata satılan torpaq sahəsi Ə.Abbasovun yeganə mülkü deyil.
Bundan başqa, o, Bilgəhdəki bağ evini, şəhərin mərkəzindəki bir neçə obyektini də satıb. Dövlətin milyonlarını talayaraq əldə etdiyi mülkləri satıb nağd pula çevirmək istəyi sabiq nazirin ziyanı ödəmək niyyəti kimi izah oluna bilər. Amma iddia olunur ki, sabiq nazirin alqı-satqını maksimim məxfi həyata keçirmək istəyi şübhələrə səbəb olub. Qaynağımız deyib ki, oğlunun adına olan torpaq sahəsini satarkən alıcıya rəsmi sənədləşməni sonraya saxlayıb, “centlmen razılaşma” təklif olunub. Alıcı isə buna razı olmayıb.
Xəbərlərə görə, Ə.Abbasov həbsdə olan aparat rəhbəri ilə yan-yana tikdirdiyi villanı satışa çıxara bilməyib, çünki mülkün üzərində həbs qərarı var.
Ə.Abbasovla bağlı xəbərlərə daha bir mühüm detalı əlavə edək. Srağagün rabitə və yüksək texnologiyalar nazirinin birinci müavini Əli Abdullayev qurumda keçirilən kollegiya iclasında yenidən Ə.Abbasovun rəhbərlik etdiyi vaxtda baş verən korrupsiya faktlarından danışıb, nazirliyə milyonlarla zərər vurulduğunu xatırladıb. Kollegiya iclasının səhəri isə sabiq nazirə cinayət işi açılması xəbəri yayılıb.
Ə.Abbasov evindədir, amma onun rahat olduğuna və tezliklə həbs olunmayacağına heç bir zəmanət yoxdur. Hadisələrin gedişi belə düşünməyə əsas verir…
Son şərhlər