Gülər Əhmədovanın 27 min dolları niyə qaytarılmır?..
Oktyabrın 21-də Milli Məclisin İqtisadi siyasət, sənaye və sahibkarlıq komitəsinin iclası keçirilib. İclasda “Kredit büroları haqqında” qanun layihəsi müzakirə edilib. İqtisadi siyasət, sənaye və sahibkarlıq komitəsinin sədri Ziyad Səmədzadə qanun layihəsi barədə məlumat verib. Deputatlar qanun layihəsi ilə bağlı təkliflərini səsləndiriblər.
Layihənin müzakirəsi isə xeyli gərgin keçib. Mübahisələr daha çox bank kreditləri ətrafında baş verib. Deputatlar Maliyyə Bazarlarına Nəzarət Palatasının sədri Rüfət Aslanovdan konkret suallarına cavab istəyiblər. Bank sektorundakı problemlərdən danışan deputat Vahid Əhmədov çıxışında bildirib ki, bağlanmış banklar əmanətini geri götürmək istəyən insanları incidir.
Deputat bank sektorunda ciddi problemlərin olduğunu deyib: “Bu məsələ ilə bağlı vətəndaşlar bizə çoxsaylı şikayət edirlər. İndi vətəndaşların bizə əlləri çatır, ona görə də dərdlərini bizə deyirlər. Biz bankların bağlanmasının tərəfdarı deyilik, onların konsolidasiyasının, təmərküzləşməsinin tərədarıyıq. Hər dəfə banklar bağlananda insanlar ciddi əziyyət çəkirlər” (azvision.az).
“Bizim keçmiş millət vəkilimiz Gülər Əhmədova mənə zəng vurub deyir ki, ləğv edilmiş ”Bank Standard”da 27 min dollar vəsaiti var. Mən bu məsələ ilə bağlı Sığorta Fondunun sədri Azad Cavadovla danışdım”. Bunu da deputat Vahid Əhmədov bildirib. O deyib ki, G.Əhmədovanın 27 min dollarını “Bank Standard”dan geri almaqda ciddi problemi var (modern.az). Deputat xatırladıb ki, bağlanmış banklar əmanətlərin geri götürülməsi ilə bağlı insanları incidir.
Maliyyə Bazarlarına Nəzarət Palatasının sədri Rüfət Aslanov isə deputata cavabında “Bu, bank sirridir. Siz gərək bunu açıb deməyəsiniz” – deyib. V.Əhmədov isə R.Aslanova sual edib: “Burada bank sirri var ki? Vətəndaşın əmanəti normal şəkildə qaytarılmır. Bank rəhbərləri hamısı milyonerdir. Heç birinin bankı bağlansa belə veclərinə deyil. Olan yenə də sadə vətəndaşlara olur”.
Deputat Əli Məsimli isə bildirib ki, banklar insanlara zülm edir: “Bizə çoxsaylı şikayətlər daxil olur. Devalvasiyadan sonra insanların qaytaracağı məbləğ artıb. Müştəri var ki, 9300 dollar məbləğində kredit götürüb, onun müəyyən hissəsini ödəyib. Devalvasiyadan sonra bank ona deyir ki, sən 14 min manat əlavə ödəməlisən. Belə çıxır ki, müştəri 9300 dollar kreditə görə 23 min manata yaxın kredit ödəməlidir. Maliyyə Bazarlarına Nəzarət Palatası bankların yox, insanların tərəfində olmalıdır, Azərbaycan dövlətinin maraqlarını qorumalıdır. İnsanlar banklardan yox, banklar insanlardan asılı olmalıdır. İndi demək olar ki, banklar insanları idarə edir”.
Müzakirələr zamanı deputat Vahid Əhmədovla Maliyyə Bazarlarına Nəzarət Palatasının sədri Rüfət Aslanlı arasında maraqlı dialoq yaranıb. Modern.az xəbər verir ki, R.Aslanlı V.Əhmədovun banklara və Maliyyə Bazarlarına Nəzarət Palatasına ünvanladığı ittihamlara cavab verərkən təmsil etdiyi qurumun dövlətin tərəfində olduğunu bildirərək Azərbaycanda baş tutmuş konstitusiya dəyişikliklərindən danışıb: “Biz dövlətin tərəfindəyik. Dövlət isə xalqdır. Dövlət xalqın iradəsini ifadə etməlidir. Mən hesab edirəm ki, Azərbaycan iqtidarı hər zaman xalqın iradəsini ifadə edib, edir və etməkdədir”. Deputat Vahid Əhmədov isə maliyyə qurumu rəhbərinin siyasətdən danışmasına bu cür münasibət bildirib: “Sən artıq keçdin siyasətə…”
R.Aslanlı isə V.Əhmədova bu cür cavab verib:
“Vahid müəllim, mən ittihamlara reaksiya verməliyəm. Biz işimizlə məşğuluq deyə, bütün məsələlərə və fikirlərə çox həssas yanaşırıq”.
“Azərbaycan Dəmir Yolları” Qapalı Səhmdar Cəmiyyətinin sədri, deputat Cavid Qurbanov da bank sektoru ilə bağlı tənqidi fikirlərini çatdırıb. “Rüfət müəllimin, bankların və bankirlərin xətrinə dəyməsin. Amma biz çalışmalıyıq ki, insanların banklardan asılılığını azaldaq və bankların insanlardan asılılığını çoxaldaq”, – deyə, C.Qurbanov bildirib. O deyib ki, bu gün banklar ölkədə istədiklərini edir: “İnsanların əmək haqlarını yüksəltmək lazımdır. Əhalinin maddi rifahını yüksəltməliyik ki, əmək haqqı artırılsın və insanlar layiqli yaşaya bilsinlər. Vergi siyasətində çox böyük dəyişikliklər edilməlidir. Vergi siyasətinin bazasını böyütməli, dəyişməli və dolğunlaşdırmalıyıq. Hər kəs vergi ödəməlidir, vergiləri sərtləşdirməklə yanaşı, bazasını yumşaltmalıyıq. Elə etməliyik ki, hər kəs vergi yüklərini ödəyə bilsin. Yəni hər bir kəs qazancına uyğun vergisini verə bilsin”.
R.Aslanllı müzakirələr zamanı bəzi xoş xəbərlərin də anonsunu verib. “Qorunmayan, sığortalanmayan əmanətlərlə bağlı bugünlərdə hökumətlə və cənab prezidentlə müzakirələr aparmışıq. Çox güman ki, qanunvericilik buna yol verərsə, bağlanmış banklarda qorunmayan və sığortalanmayan əmanətlərin də vətəndaşlara qaytarılmasını həyata keçirəcəyik”, – deyə Palata sədri bildirib. Onun sözlərinə görə, məsələ ölkə başçısının xüsusi nəzarətindədir və bu cür əmanətlərin qaytarılması həyata keçiriləcək.
R.Aslanlı onu da deyib ki, problemli kreditlərlə bağlı yaxın günlərdə qərar qəbul ediləcək.
Son şərhlər