“Əgər xoşun gəlmirsə, başqa yerə köç”.
Bakı Ağır Cinayətlər Məhkəməsində Saatlı rayon sakini Ceyhun Rəhimovun (1990-cı il təv.) CM-nin 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.
Ötən il oktyabrın 6-da 20-ci sahə adlanan ərazidə məişət münaqişəsi zəminində Ceyhun Rəhimov qonşusu Əliağa Məmmədova (1981-ci il təv.) bıçaqla xəsarətlər yetirərək, onu ağır yaralayıb. Sonuncu Kliniki Tibbi Mərkəzə aparılarkən kəskin qanitirmədən vəfat edib, daxil olan məlumat əsasında Səbail RPİ 8-ci polis bölməsinin əməkdaşları şübhəli şəxsi evində saxlayıblar və o, istintaqa təqdim edilib.
İstintaqla müəyyən edilib ki, tikintidə fəhlə işləyən Ceyhun Rəhimov təxminən saat 23.30 radələrində kirayədə yaşadığı evə qayıdaraq, yatmağa hazırlaşıb. Amma qonşuluqda yaşayan evdən səs-küy gəldiyindən o, heç cür yuxuya gedə bilməyib.
Rəhimov bilirdi ki, qonşuluqda yaşayan Əliağa Məmmədov tez-tez sərxoş məclisləri quraraq, dost-tanışını başına yığıb və gecə saatlarınadək qonşuları narahat edib. Bu səbəbdən Ceyhun ayağa qalxaraq, bir həyətdə yaşayan Əliağanın qapısını döyüb, sərxoş vəziyyətdə olan sonuncu qapını açıb, nə istədiyini soruşduqda, Rəhimov imkan varsa özlərini bir az sakit aparmalarını, artıq gecə və səhər işə getməli olduğunu deyib.
Cavab olaraq, Əliağa heç kimi narahat etmədiklərini deyib və bildirib ki “əgər xoşun gəlmirsə, başqa yerə köç”. Qonşunun kobud davranışından hiddətlənən Rəhimov geri qayıdıb, lakin Məmmədovun təhqiredici ifadəsi ona rahatlıq verməyib. Əliağadan qisas almaq məqsədi ilə Ceyhun məişət-təsərrüfat təyinatlı bıçağı götürərək, yenidən onun qapısını döyüb. Bu dəfə qapını Məmmədovun tanışı, İsgəndər Yahyayev açıb, ardınca isə Əliağa özü də çıxıb.
Əsəbi halda olan Rəhimov musiqinin səsini azaltmalarını və qışqırmamalarını tələb etdikdə, aralarında qarşılıqlı söyüşlərlə müşahidə olunan mübahisə başlayıb. Səs-küyə içəridə olan Məmmədovun daha bir neçə tanışı çıxıb və Ceyhuna əl-qol ataraq, zərbələr vurmağa başlayıblar.
Yerə yıxılmış vəziyyətdə olan Rəhimov qarşıdurma zamanı bıçaqla aşağıdan yuxarıya qarşısında olan Məmmədova bir neçə zərbə vurub. Yaralanan şəxs dostlarının köməkliyi ilə taksi avtomaşını ilə xəstəxanaya aparılarkən yolda dünyasını dəyişib.
Məhkəmə prosesində C.Rəhimov özünü ittiham üzrə təqsirli bilərək, əməlindən peşman olduğunu göstərib.
Məhkəmənin hökmü ilə təqsirləndirilən şəxs cəzasını ciddi-rejimli cəzaçəkmə müəssisəsində çəkməklə 13 il müddətinə azadlıqdan məhrumetmə cəzasına məhkum olunub.
Son şərhlər