Türkiyə Prezidenti Rəcəb Tayyib Ərdoğan və İran prezidentinin müavini İshaq Cahangiri arasında Türkmənistanda keçirilən ikitərəfli görüş zamanı İran bayrağının qoyulmaması və hər iki rəsmi şəxsin əyləşdiyi stullar arasındakı fərq qalmaqala səbəb olub.

Türkmənistanın paytaxtı Aşqabadda Tərəfsizlik konfransı çərçivəsində baş tutan 20 dəqiqəlik görüş İran mediasının ciddi tənqidinə səbəb olub.

İrandakı bəzi media qurumları sözügedən görüşdə İran bayrağının olmamasına, Ərdoğan və Cahangirinin oturduğu stulların fərqinə və türk liderin əyləşmək qaydasına diqqət çəkərək İranın alçaldıldığını bildiriblər.

Lakin adı açıqlanmayan iranlı rəsmi şəxs İranın alçaldılması haqda fikirləri rədd edib. O, buna baxmayaraq, rəsmi Tehranın məsələyə lazımi cavab verəcəyini açıqlayıb.