Aydın Canıyevdən şənbə köşəsi
Bu həftə çox pis doğuldu və çox pis də öldü!
Əlil uşaqlar kimi, ömrümüzdən kəsib atmağa qıya bilmədiklərimiz kimi! Bomboz günlərin inikası, həyatımızın neqativ proyeksiyası, yaşamın ikili kompozisiyası kimi lap.
Nazirliklərdən generalları, polkovnikləri… göyərçinləri dənləməyə çağırırmış kimi çağırıb dənləyən “quşbazlıq” bir yana qaldı… “axırıncı qatar” məsələsi və bir də falçıların fəaliyyətinə qadağa qoyulması söhbəti gündəmi bürüdü! Artıq bu ölkədə fal açdırıb xoşbəxt gələcək xəyallarıyla hallanan adamların da kitabı bağlandı.
Sizə demişdim axı, biz o gurultulu seçki həftəsindən guppultuyla yıxılacağıq. Yıxıldıq da. Hələ də bəzi sadəlöhvlərin və nikbinlərin arzularının yüksəkliyindən düz dərənin dibinə.
Xoşbəxtlikdən ya bədbəxtlikdəndi bilmirəm, Allah da bu həftə başımızı qatacaq bir xəbər yollamadı ki, “ölkəmizdə kim seçildi, kim qaldı?” mərhələsini bir az asan adlayaq. Sosial şəbəkələrimiz bu həftə “axırıncı vaqon” məsələsiylə yavanlıq elədi. Bir də falçılara fal açmaqla. Bir də məclisimizin keçən həftəki seçki süfrəsindən qalan artıqlarla.
Buna da şükür, nə deyək, bizim “həci yaxçi həcüdü”, “Yaaaa-vər!”, “penoplast”, “alabala”… ilə “zakuska elədiyimiz günlər, həftələr olub. Ya da başdan- ayağa zəhər-zəqqumlu menyumuz.
Ona görə də hansısa bədxəbər, öldürücü günlərə baxanda, belə məzəli, “razvyazka”sız, ölü günlər daha caizdi. Nə olsun ki, bu həftənin də içindən bir şey çıxmadı. O məşhur misaldakı kimi, hərə qaranlıqda filin bir əzasına toxundu, biri sütun “gördü”, biri xalça, fili isə görən olmadı.
Əvəzində deputatlığa namizədlərimizin gözlərimiz önünə yapışdırılmış rəngli şəkillərini baxışlarımızın qarşısından qopartdılar, qulağımızı yağır eləmiş bəzəkli vədlər susdu, məhsul bayramı sayaq küçə tamaşalarına son qoyuldu, ağız deyəni qulaq eşidər oldu.
Hə… bir də, bu həftə Aynur İmranova bu susqun qurbağa gölünə bir daş atdı. Rəqibin cərimə meydançasına yaxınlaşmaq kimi. Biz azarkeşlərin də ölmüş həyəcanı bir qədər tərpənib, dayandı, vəssalam.
Beləcə, boz bir ölkədə boz bir təqvimin boz bir həftəsini də yola verdik. Bəlkə elə xalq düz eləyir, bu durumda ən yaxşı seçim elə yatmaqdı, ən azından rəngli yuxular görmək üçün.
Əlqərəz, bu həftə də belə öldü – Allah yanında yatanlara rəhmət eləsin!
Son şərhlər