MTN-in öz kadr siyasətində əsasən polisin OBXSS və cinayət-axtarış bölmələri əməkdaşlarına üstünlük vermiş əvvəlki rəhbərliyinin istefasından sonra nazirliyin yeni rəhbərliyi köklü kadr dəyişikliklərinə başlayıb.
Bütün şüurlu həyatı boyu OBXSS rəhbəri işləyən və polis nazirliyinin iqtisadi cinayətkarlıqla mübarizə aparan bu qurumunun əksər iş metodlarını və ənənələrini özü ilə MTN-ə gətirən sabiq nazir Eldar Mahmudov tərəfindən işdən azad olunmuş peşəkar çekistlər yenidən MTN-ə qaytarılır.
Azərbaycanda azad sahibkarlığın və biznesin inkişafı qarşısında əsas maneələrdən birinə çevrilmiş MTN rəhbərliyi neytrallaşdırılandan sonra təcrübəli və peşəkar çekistlər, uzun illər dövlət təhlükəsizliyi orqanlarında xidmət keçmiş şəxslər yenidən xüsusi xidmət orqanlarına işə qayıtmağa başlayıb.
Virtualaz.org saytının əldə etdiyi məlumata görə, polkovnik İsmayıl Bağırov milli təhlükəsizlik nazirinin vəzifəsini icra edən general-leytenant Mədət Quliyevin bu gün imzaladığı əmrlə MTN Əks-Kəşfiyyat İdarəsinin rəisi təyin edilib. General Quliyevin digər əmri ilə isə polkovnik Sahib Nağıyev nazirliyin aparat rəhbəri təyin olunub.
Mədət Quliyevin əmri ilə daha bir peşəkar çekist Ceyhun Şadlinski MTN-in Transmilli Mütəşəkkil Cinayətkarlıqla Mübarizə İdarəsinin rəisi vəzifəsinə təyinat alıb.
Keçmiş polis işçiləri – MTN-in İstintaq İdarəsinin rəisi, general-mayor Mövlan Şıxəliyev və MTN əməkdaşı Elşad Mahmudov isə tutduqları vəzifədən azad olunublar.
Qeyd edək ki, bəzi KİV-lərin yazdığı kimi, hazırda sərəncamda olan Elşad Mahmudov sabiq nazir Eldar Mahmudovun qohumu deyil.
MTN-dəki kadr islahatları davam edir.
Son şərhlər