Parlamentdə “Reklam haqqında” Qanunun müzakirəsi keçirilib və qəbul edilib
Milli Məclisin bu gün keçirilən iclasında “Reklam haqqında” qanun layihəsi ikinci oxunuşda müzakirəyə çıxarılıb. Layihəni həmkarı Əli Məsimli ilə birgə hazırlayan İqtisadi siyasət komitəsinin üzvü Vahid Əhmədov bildirib ki, layihədə sosial və kommersiya reklamlarının fərqi açıq şəkildə göstərilib.
Deputat Sevinc Fətəliyeva isə qeyd edib ki, layihədə sosial reklamların verilməsi ilə bağlı məsələlərin öz əksini tapması təqdirəlayiqdir.
Zahid Orucun fikrincə, “Televiziya və radio yayımı haqqında” qanunda da dəyişikliklər edilməlidir. O, şou verilişlərinin Azərbaycan televiziyalarında çox olmasını tənqid edib.
“Bu gün məktəb dəftərlərin üstündə Messinin reklamı gedir, amma ayağında top yoxdur, əlində “Pepsi” var”. Bunu isə qanun layihəsinin ikinci oxunuşda müzakirəsi zamanı deputat Musa Quliyev deyib.
O, bildirib ki, bu cür reklamlardan sonra məktəblilərin sərinləşdirici içkilərə marağı artır: “Məktəbli “Pepsi”ni görür, həvəslənir və gedib onu alır. Halbuki, bu içkilər insan orqanizminə ziyandır”.
M.Quliyev alkoqollu içkilərin reklamına da münasibət bildirib. O, qeyd edib ki, rəsmi idman yarışları zamanı alkoqollu içkilərin reklamına qadağa qoyulmalıdır.
Deputat, ümumiyyətlə, spirtli içkilərin reklam edilməsinin əleyhinədir: “İctimai yerlərdə alkoqollu içkilərin reklam edilməsi üçün ayrılan yerlərə diqqət yetirilməlidir”.
Sahib Alıyev zərərli çağırışlarla və gizli reklamla bağlı danışıb: “İnternetdə elə səhifələr, ya bloggerlərin səhifələri var ki, onun girişləri ən çox tirajlı qəzetlərdən qat-qat artıqdır”.
Deputat deyib ki, bizdə reklam hazırlamaq mədəniyyəti o qədər də yüksək deyil: “Odur ki, sosial reklam hazırlayan bir qurumun yaradılmasına ehtiyac var”.
Etibar Hüseynov deyib ki, sağlamlığa siqaretdən çox alkoqollu içkilər daha çox ziyan vurur. Ona görə də o, alkoqollu içkilərlə bağlı cəzanın ağırlaşdırılmasını zəruri saydı.
Vitse-spiker Valeh Ələsgərov içkinin reklamı ilə bağlı tənqidlərə belə reaksiya verib: “Gəlin, hamımız ailədən başlayaq. Uşaq ailədə düzgün tərbiyə görsə, heç bir reklama-filana ehtiyac qalmır”.
Fəzail Ağamalı deyib ki, Bakının küçələrində gəzərkən reklamlara baxmaq kifayətdir ki, qanuna nə dərəcədə əməl olunduğu aydınlaşsın: “Ona görə də bura əlavə olunsun ki, bu qanunun tələblərini pozan reklam subyektləri Azərbaycan Respublikasının qanunları qarşısında məsuliyyət daşıyır”.
Deputat sosial reklamların ödənişsiz yayılmasını zəruri sayıb.
Hadi Rəcəbli sosial reklamların şəhərin mərkəzi hissələrində yerləşdirilməsini daha effektli hesab edib.
Müzakirələrdən sonra layihə ikinci oxunuşda qəbul olunub.
Son şərhlər