Rusiya azərbaycanlıları Abbas Abbasovdan Putinə şikayət etdilər

Rusiyada yaşayan azərbaycanlılar RF prezidenti Vladimir Putinə müraciət ünvanlayaraq, Azərbaycan Respublikası baş nazirinin birinci müavini Abbas Abbasovdan şikayət ediblər. Moderator.az saytında dərc olunmuş müraciətin mətni aşağıdakı kimidir:

                                                                                     

Rusiya Federasiyasının prezidenti cənab Vladimir Putinə

Rusiyanın Azərbaycan təşkilatlarının rəhbərləri və üzvləri – “FMMM AzərRos: konsolidasiya və böhrandan çıxış problemləri” mövzusundakı dəyirmi masa iştirakçıları tərəfindən

Möhtərəm Vladimir Vladimiroviç!

Son zamanlar Rusiya azərbaycanlılarının Federal Milli-Mədəni Muxtariyyətinin (FMMM AzərRos) ətrafında yaranmış və təşkilatı dağılma təhlükəsi qarşısında qoyan dramatik vəziyyət bizləri Sizə müraciət etməyə vadar etdi. Belə ki, Azərbaycan vətəndaşı, Azərbaycan Respublikasının Baş nazirinin keçmiş müavini Abbas Abbasov, ondan maddi olaraq asılı olan tərəfdaşları ilə Rusiya Federasiyasının 17.06.1996-cı il tarixli, 74-FZ saylı “Milli-mədəni muxtariyyət haqqında” Federal Qanununu və Rusiya Federasiyasının 20.07.2012-ci il tarixli N 121-FZ saylı, “Rusiya Federasiyasının xarici agentlik funksiyalarını həyata keçirən qeyri kommersiya təşkilatlarının fəaliyyətinin tənzimlənməsi haqqında ayrı qanunverici aktlara dəyişikliklərin edilməsi haqqında” Federal Qanununu kobud şəkildə pozaraq, “AzərRos” FMMM ictimai təşkilatını zəbt etməyə çalışır.

AzərRos FMMM 1999-cu ildə Rusiyada yaradılıb. Öz fəaliyyəti dövründə təşkilat RF-ki azərbaycanlı icmalarını vahid mərkəz ətrafında birləşdirməyə nail olub, FMMM-in tərkibinə 40-dan artıq regional təşkilat daxil olub. Son zamanlara qədər AzərRos FMMM Azərbaycan mədəniyyətinin və adət-ənənələrinin qorunması, çoxmillətli Rusiyada yaşayan xalqlar arasında barışığın möhkəmlənməsi, Azərbaycan və Rusiya xalqları və dövlətləri arasında dostluq və mehribançılığın inkişaf edilməsi kimi tapşırıqları layiqincə yerinə yetirib. Təşkilat çox millətli Rusiya cəmiyyətində ekstremizmə, separatizmə və radikalizmə qarşı müqavimət göstərib, ölkə rəhbərliyinin siyasi kursunu daima dəstəkləyib. Sizin göstərişiniz əsasında 2001-2003-cü illərdə AzərRos FMMM-in rəhbəri, etibarlı nümayəndəniz Söyün Sadıxov milli məsələlər üzrə keçmiş nazir Vladimir Zorin və RF XİN-in nümayəndələri ilə  birlikdə AŞPA və AŞ-ın milli azlıqların məsələləri ilə bağlı iclaslarında iştirak edib, Rusiyanın maraqlarını təmsil edib, həmçinin Şimali Qafqazda konstitusiya qayda-qanununun tətbiqi və terrorizmlə mübarizə kimi ciddi məsələlərdə Sizin siyasətinizi dəstəkləyib.

Lakin, son il yarım ərzində bu şərəfli fəaliyyəti davam etdirmək və ictimaiyyət üçün əhəmiyyətli olan işin aparılması əvəzinə, biz AzərRos FMMM-in fəaliyyətində eniş müşahidə edirik. AzəRos FMMM-in problemləri 2013-cü ildə təşkilatın rəhbərliyinin dəyişməsi ilə başlanıb. Belə ki, Abbas Abbasov hiyləgər vasitələrlə muxtariyyətin prezidenti vəzifəsinə, qurumu öz şəxsi mənafeləri və gücü üçün mənbə kimi görən Asif Məhərrəmovu gətirdi (DİN ehtiyat olan polkovniki). Bu sözdə xadim, özünü FMMM-in tərkibində qurmuş olduğu Ağsaqqallar Şurasının sədri elan etmiş Abbas Abbasovun əlində oyuncağa çevrildi. A.Abbasovun timsalındakı yeni rəhbərlik, 15 il AzərRos FMMM-in ictimai-siyasi həyatında müvəffəqiyyətlə və fəal iştirak etmiş, lakin Abbasov siyasəti ilə razılaşmayan regional və yerli təşkilatların nümayəndələrindən qurtulmaq məqsədi ilə 28 fevral 2014-cü il tarixində RF Ədliyyə Nazirliyinin nümayəndəsinin iştirakı olmadan “kağız üzərində” qurultay keçirib. A.Abbasov və A.Məhərrəmov Sizin və Azərbaycan Respublikasının Prezidenti adından istifadə edərək, Rusiya azərbaycanlıları üzərində “nəzarətçi” və “polisay” mövqeyini tutmuşlar. Öz şəxsi ambisiyalarını rəhbər tutaraq, A.Abbasov AzərRos FMMM-i öz siyasi maraqlarını həyata keçirmək üçün bir alətə çevirmişdir. Bunun nəticəsində o, Rusiyanın azərbaycanlı icmasının, həmçinin Rusiya və Azərbaycan xalqlarının münasibətlərində gərginlik mənbəyinə çevrildi. Ağsaqqallar Şurasının keçmiş üzvü Rüstəm İbrahimbəyovla birlikdə o, öz əməlləri ilə Sizin adınızdan Azərbaycanın rəhbərliyinə ünvanlanan müxtəlif məzmunlu bəyanatlarla çıxış edərək Azərbaycan ictimaiyyətində Rusiya hökumətinə qarşı etibarsızlıq yaratdı. A.Abbasovun bu hərəkətləri Azərbaycan ictimaiyyəti və Rusiya azərbaycanlıları tərəfindən mənfi qarşılandı. 

AzərRos FMMM-in yeni rəhbərliyi ilə danışıqlar aparmaq istiqamətində göstərilən bütün səylər A.Abbasovun tutduğu mövqe, təşkilatda qurduğu avtoritar idarəetmə ucbatından uğursuzluğa düçar oldu, rəhbərlikdən fərqli düşünən hər kəsi təşkilatdan kənarlaşdıraraq, o AzərRos FMMM-i ciblik bir quruma çevirdi.  Son iki il ərzində AzərRos FMMM-dən bütün “xoşagəlməz” regional təşkilatlar xaric edilib – 2015-ci ilin əvvəlinə onun tərkibində cəmi 4 milli-mədəni muxtariyyət qaldı. 

AzərRos FMMM-ki böhranın həlli məqsədi ilə təşkilatın Federal Şuranın üzvləri və rəhbərləri 17 yanvar 2015-ci il tarixində öz sıralarına 120 nümayəndəni və bütün Rusiyadan 200-zə yaxın qonağı toplamış növbədən kənar qurultayın keçirilməsini təmin etdilər. Qeyd etmək lazımdır ki, qurultay RF hüquq-mühafizə təşkilatlarının təzyiqi altında keçirildi. Milli məsələləri idarə edən Prezident Administrasiyasının bəzi məmurları bölgələrdəki Azərbaycan təşkilatlarının üzvlərinə təzyiqlər göstərərək, öz hərəkətləri ilə fitnə və münaqişəni gərginləşdirərək legitim qurultayın keçirilməsinə maneələr yaratmağa çalışdılar. Biz hesab edirik ki, onlar A.Abbasov tərəfindən aldadılıblar. 

Qurultayda muxtariyyətin son iki ildəki fəaliyyəti qeyri qənaətbəxş hesab edilib, iştirakçılar A.Məhərrəmova və A.Abbasova qarşı etimadsızlıqlarını ifadə edərək, sonuncunun başçılıq etdiyi Ağsaqqallar Şurasını  ləğv etdilər. Təşkilatın birliyi və barışığı naminə iştirakçılar cari ilin 6 mart tarixinədək qurultayın işində fasilə elan etdilər və A.Abbasovu danışıqlara çağırdılar. Lakin o, ümumrusiya azərbaycanlılarının qərarına laqeyd yanaşdı. Açıq dezinformasiya və saxtakarlıqla o, Rusiya dövlət qurumlarının, xüsusi ilə Prezident Administrasiyasının, Ədliyyə Nazirliyinin və Daxili İşlər Nazirliyinin nümayəndələrini hələdə aldatmağa davam edir. 28 fevral tarixində A.Abbasov Moskvanın Millətlər Evində Azərbaycan ictimaiyyətindən və kütləvi informasiya vasitələrindən gizli olaraq, bağlı qapılar arxasında, Rusiyanın 40-dan artıq regional və yerli Azərbaycan ictimai təşkilatının nümayəndələrinin iştirakı olmadan, lakin RF Ədliyyə Nazirliyinin  nümayəndəsinin və cəmi 4 (!) regional təşkilatın nümayəndəsinin iştirak ilə “uğurlu qurultay” keçirtdi. AzərRos FMMM FŞ-ın , təşkilatın əsasını təşkil edən, həmçinin regional və yerli milli-mədəni muxtariyyətlərinin üzvləri münaqişə vəziyyətinin həlli üçün Moskva Millətlər Evinin önünə gəlmişlər, lakin onların qarşısı RF DİN və xüsusi təyinatlı qüvvələri, həmçinin A.Abbasovun kiraladığı Dağıstanlı dəstələr tərəfindən kobud şəkildə kəsilmişdi. Biz bu 28 fevral qurama və saxta qurultayı qeyri qanuni hesab edirik və AzərRos FMMM FŞ-ın əksər üzvünün və Rusiyadakı Azərbaycan təşkilatlarının rəhbərlərinin tam iştirakı olmadan qəbul edilmiş qərarların ləğv edilməsini tələb edəcəyik. Öz hərəkətləri ilə A.Abbasov icma daxilindəki münaqişəni və AzərRos FMMM-ki parçalanmanı daha da dərinləşdirdi və çıxılmaz bir nöqtəyə gətirdi.

Hörmətli Vladimir Vladimiroviç!

Biz düşünürük ki, AzərRos FMMM-in parçalanması artıq Azərbaycan icmasının bilavasitə daxili problemi deyil. Kəskinləşən qarşıdurma, çox millətli Rusiya cəmiyyətində bütövlüklə xoşagəlməz mühitin yaranmasına səbəb olur. Rusiya ətrafında mövcud gərgin siyasi şəraitdə bizlər, Rusiya vətəndaşları, cəmiyyətin daxilindəki narazıçılıqları aradan qaldıraraq birliyə nail olmaq istəyirik. Biz bu gün dünya və Ukrayna ətrafında mövcud olan gərgin vəziyyətdə AzərRos FMMM-dəki münaqişənin daxili çərçivədən millətlər arası səviyyəyə daşmasından ehtiyat edirik. Münaqişənin artmasının və yaranmış böhrandan çıxış yolunun tapılması məqsədi ilə biz, Sizə RF vətəndaşlarının konstitusiya hüquqlarının qarantı kimi müraciət edərək, RF “İctimai təşkilatlar haqqında” və RF “Milli-mədəni muxtariyyət haqqında” Qanunların pozulması məsələsinin araşdırılması məqsədi ilə aidiyyəti hökumət təşkilatlarına, həmçinin milli siyasət məsələləri üzrə səlahiyyətli olan RF Prezidenti Administrasiyası rəhbərinin müavini Maqomed Maqomedsalamova və RF Ədliyyə Nazirliyinə AzərRos FMMM-in fəallarının iştirakı ilə iclasın keçirilməsinə dair göstəriş verməyinizi xahiş edirik.

Dərin hörmətlə,

Moskva şəh. 3 mart 2015-c il.

Dəyirmi masa iştirakçılarının

tapşırığı ilə AzərRos FMMM-in

Prezidenti v.m.i.e., Federal Şuranın üzvü Hacıyev T.S.