Rusiya prezidentini mübhəm itkisinin arxasında səhhət problemi dayanır, yoxsa…
Rusiya prezidenti Vladimir Putin martın 6-dan “yoxa çıxıb”. Cəmiyyət arasında, siyasi kluarlarda və mediada görünməyən prezident barədə çoxsaylı şayiələr var. Sonuncu dəfə Putin martın 5-də İtaliyanın baş nazırı Matteo Rentsi ilə görüşüb. Bundan sonra Kreml Putinin 8 mart münasibətilə qadınlarla görüşməsinə dair məlumat yayıb. Amma Rusiyanın bəzi KİV orqanlarının versiyasına görə, əslində bu görüş də martın 5-də keçirilib. Putinin yorğun olduğu görüş iştirakçılarının gözündən yayınmayıb.
Putinin martın 12-13-də Astanaya planlaşdırılan səfəri xəstəlik səbəbindən təxirə salınıb. Bu da “Reuters” agentliyinin versiyalarından biridir. Onun səhhətində problemlər olması barədə xəbərlər isə bir neçə ildir ki, medianın gündəmindədir. Xüsusən də onun kürəyində, ayağında problemlər olması barədə ən son “The New York Times” qəzeti yazıb. Onun səhhətində yenidən problem yaranması ilə bağlı şübhələr isə M.Rentsi ilə görüşündən sonra publika qarşısına çıxmamasına görə artıb.
Putinin mətbuat katibi Dmitri Peskov isə öz bossunun səhhətində problemlər olması versiyalarını inkar edib və onun “itkin düşməsini” gərgin qrafik, ictimaiyyət üçün açıqlanmayacaq görüşlərinin olması ilə izah edib. D.Peskov eyni zamanda deyib ki, xəstəlik iddiasını dilə gətirib, onu yayanların öz psixoloji durumları qaydasında deyil və onlar bahar qızdırmasından əziyyət çəkirlər.
V.Putinin keçmiş müşaviri Andrey İlliarionov isə bütün faktları təhlil edərək belə bir nəticəyə gəlib ki, Rusiya rəsmiləri “saray çevrilişi” nəzərdə tutublar. Onun fikrincə, Rusiya Prezident Administrasiyasının rəhbəri Sergey İvanov tezliklə baş nazir vəzifəsinə təyin ediləcək. Bundan sonra isə Putinin yorulması və istirahətə ehtiyacı olması barədə ssenari həyata keçiriləcək.
Putinin itməsində Ramzan Kadırov faktorunu isə rusiyalı politoloq Stanislav Belkovski qabardıb. Belkovskinin fikrincə, müxalifətçi Boris Nemtsovun qətlində əli olduğu ehtimal edilən R.Kadırovun “güclü əllər” tərəfindən tələb edilməsi, Putinin isə onu qurban vermək istəməməsidir.
Məhz bu səbəbdən Rusiya prezidentinin ciddi psixoloji problemlər yaşadığı iddia edilir. İndiki halda Putinin qarşısında iki yol var: ya əlini Kadırovun üzərindən çəkməli, ya da keçmiş həmkarları olan milli təhlükəsizlik xidməti ilə açıq anlaşmaya getməlidir.
Daha bir məlumat isə Putinin 12 martda Ermənistan prezidenti Serj Sərkisyanla telefonla danışmasıdır. Prezident Administrasiyasından bu danışıqla bağlı yayılan xəbərdə isə bildirilir ki, danışıqlar zamanı Putinin saxta erməni soyqırımının 100-cü ildönümü ilə bağlı keçiriləcək tədbirlər çərçivəsində İrəvana, Sərkisyanın isə II Dünya müharibəsinin 70-ci zəfər qutlamaları ilə bağlı Moskvaya gedəcəyi məsələsində razılığa gəliblər.
İlk olaraq Qazaxıstan mediasında yer alan, daha sonra isə sürətlə Rusiya, ordan da Azərbaycan mediasına sıçrayan bir xəbər isə guya Putinin müsəlman olması ilə bağlıdır. ANS PRESS-in məlumatına görə, Peskov xəbəri təsdiqləyərək bildirib ki, həqiqətən, belə bir qərar qəbul edilib. Çeçenistanın lideri Ramzan Kadırov da öz tvitter səhifəsində heç vaxt bu qədər xoşbəxt olmadığını yazıb və ümid etdiyini bildirib ki, “tezliklə Vladimir Putin bütün kafirlərə və münafiqlərə qarşı cihad elan edəcək”. Bu xəbəri Rusiyanın xarici İşlər naziri Sergey Lavrov da təsdiqləyib. O bildirib ki, tezliklə Rusiyaya müsəlman dövlətlərindən nümayəndə heyəti gələcək.
Rusiyalı politoloq Sergey Makarov isə bu xəbəri şərh edərək deyib ki, Putinin bu qərarı geosiyasi vəziyyətlə əlaqədardır. “Bizim prezident hər şeydən əvvəl Rusiyanı fikirləşir. Biz qərbin liberal pozğunluğunun əhatəsində qalmayaq deyə bizə güclü tərəfdaşlar lazımdır. İslam ölkələri də etibarlı tərəfdaş ola bilərlər. Onsuz da, Allah birdir” deyə, politoloq əlavə edib.
Amma dediyimiz kimi, bu, sadəcə təsdiqlənməmiş bir iddiadır. Və bunu yazan media orqanlarının istinad nöqtəsi kimi “İnterfax” agentliyini göstərsələr də, sözügedən agentlikdə bununla bağlı hər hansı xəbər yer almayıb. Üstəlik, Rusiyadakı saytlar, sosial şəbəkələrdəki müzakirələrdə bu xəbər sadəcə gülüş obyekti olaraq qiymətləndirilir.
Kremlin martın 13-də yaydığı açıqlamada isə qeyd edilib ki, artıq Putin görüşlərini davam etdirir. Belə ki, Rusiya prezidenti Ali Məhkəmə rəhbəri Vyaçeslav Lebedevlə görüşüb. Sözügedən xəbərdə Rusiya prezidentinin yorğun, xəstəhal görüntülü fotoları da əlavə edilib. Bundan başqa, Rusiya informasiya agentlikləri də bu xəbəri yayıb. Amma onlardan heç biri öz materiallarında “görüş bu gün baş verib” cümləsini işlətməyib ki, bu da yetərincə diqqət çəkən məqamdır.
“Vedomosti” qəzeti isə Putinlə bağlı yazısında qeyd edib ki, prezidentin səhhətində hər şey qaydasındadır. Məqalədə yazılanlara görə, “Putinlə bağlı hər şey qaydasındadır və xəstəliyi ilə bağlı yazılanların heç bir əsası yoxdur. Vətəndaşların öz ölkəsinin prezidentinin səhhətinə bu qədər diqqət ayırmasına isə təəccüblənmək lazım deyiil”.
Günün sonunda isə Rusiyanın bəzi saytları prezident Vladimir Putinin oğlunun dünyaya gəlməsi barədə xəbər yaydı. Rusiya mediasının istinad nöqtəsi isə İsveçrənin “Blick” nəşri oldu.
Məlumata görə, Putinə yaxınlığı ilə tanınan və Rusiyanın “Milli Media Qrupu” Holdinqinin direktorlar şurasının sədri vəzifəsində çalışan Alina Kabayeva İsveçrənin Tessin əyalətinin “Müqəddəs Ann” klinikasında uşaq doğub. Bu klinika öz reputasiyasına görə dünyada çox populyar hesab edilir. Putinin oğlunun dünyaya gəldiyi haqda artıq bu əyalətinin bütün sakinləri danışırlar.
İsveçrə mediası son günlər Putinin ictimaiyyət qarşısına çıxmamasını bununla əlaqələndirir. Bu, prezidentin A.Kabayevadan dünyaya gələn üçüncü övladıdır. Onun bu münasibətlərdən bir oğlu, bir qızı da var.
Son şərhlər