Əməkdar artist yeni albomunu dahi bəstəkar Üzeyir Hacıbəyliyə həsr edib
Azərbaycanın əməkdar artisti Yaqub Zurufçu dahi bəstəkar Üzeyir Hacıbəyliyə albom həsr edib.
ANS PRESS-in məlumatına görə, “İthaf” adlı albomda 16 əsər yer alıb. Əsərlər Simfonik orkestrin müşayəti ilə Amerika Birləşmiş Ştatlarının Los Anceles şəhərində lentə alınıb.
Albom diskdən və nəfis tətrib olunmuş 25 səhifəlik kitabçadan ibarətdir. Kitabçada Azərbaycan musiqisinin banisi, ictimai xadim, böyük şəxsiyyət Üzeyir bəyin yaradıcılığına qısa səyahət, həmçinin əsərlərin müəllifləri və mətnləri qeyd olunub.
Zurufçu yeni albomunda yer alan musiqi parçalarından söz açıdı: “Bu albomda Azərbaycanın böyük bəstəkarlarının əsərlərini, daha dəqiq desək, Üzeyir bəyin “Koroğlu” “Arşın mal alan” operalarından ariyalar, Niyazi, Fikrət Əmirov, Tofiq Quliyev, Vasif Adıgözəlov, Cahangir Cahangirov və başqa böyük bəstəkarlarımızın əsərlərini ifa etmişəm”.
“İtfah” albomunun təqdimat mərasimi fevralın 13-də Üzeyir Hacıbəylinin Ev Muzeyində təşkil olunacaq. Tədbirə incəsənət xadimləri ilə yanaşı media nümayəndələri də dəvət edilib.
ANS PRESS
