Həsən Kərimov Avropa Məhkəməsinin barışıq təklifini qəbul etməsi ilə bağlı məsələyə aydınlıq gətirdi
AXCP sədrinin müavini Həsən Kərimov Azərbaycan hakimiyyəti ilə barışmaqla bağlı Avropa İnsan Hüquları Məhkəməsinin təklifini qəbul edib. Bu günlərdə həmin barışıq məhkəmədə rəsmiləşdirilib. Qərara görə, Azərbaycan hökuməti şikayətçinin hüququnun pozulmasını etiraf edir, ona mənəvi zərərə görə 7500 avro, vəkil xidmətinə görə isə 1000 avro ödəyir.
Həsən Kərimov “Azadlıq” radiosuna deyib ki, bu şərtlərlə razılaşmağa partiya rəhbərliyi ilə məsləhətləşdikdən sonra qərar verib:
“2-3 ay öncə Avropa Məhkəməsindən məktub gəlmişdi ki, hakimiyyət orqanları mənimlə barışmaq istəyir və münasibət bildirməyimi istəyirlər. Mən də dedim ki, hakimiyyət orqanları buraxılmış səhvləri etiraf etsə, razı olaram. Bu şərtlərlə razılaşdım. Bu məsələdə mənim hakimiyyətlə heç bir əlaqəm, danışığım olmayıb. Məsləni Avropa Məhkəməsi özü həll edib. Qərarı özbaşıma verməmişəm. Məsələni öncə partiyada məsləhətləşdik və qərara gəlindi ki, səhhətimi nəzərə alaraq təklifi qəbul edim”.
DOQQUZ İL GECİKDİRİLƏN QƏRAR
Amma Həsən Kərimov eyni dairədən 2005-ci ildə də deputatlığa namizəd olub və seçkidə qanun pozuntularla bağlı Avropa Məhkəməsinə şikayət edib. Bu şikayətlə bağlı Avropa Məhkəməsinin daha bir qərarı da 9 il sonra – keçən ilin sentyabrında çıxarılmışdı.
Həmin qərar əsasən Azərbaycan hakimiyyəti pozuntulara görə 10 min avro cərimələnib. Həsən Kərimov bu qərarı yumşaq hesab edir. O deyib ki, qərarın 9 il gecikdirilməsi və nəticədə də onun fikrincə, “yumşaq qərar” çıxarılmasında Azərbaycan hakimiyyətinin təsiri olub.
Həsən Kərimov deyib ki, sonuncu barışıq təklifini qəbul etməsində də əvvəlki şikayəti üzrə gec və onu qane etməyən qərarın qəbulu rol oynayıb: “Həmin dairə çox əhəmiyyətlidir. Prezident və onun ailə üzvləri burada səs verirlər. 2005-ci il seçkilərində protokollarda 32 məntəqənin 29-da mənim xeyrimə nəticə göstərilmişdi. Bu mənim deputat seçilməyim demək idi. Hakimiyyət bu məhkəmədə uduzacağı təqdirdə biabır olacaqdı. Ona görə də bütün gücü qoyub qərarı gecikdirməklə bu məsələnin əhəmiyyətini azaltdılar. Biz gözləyirdik ki, hakimiyyətdən mənim 5 il deputat maaşımın ödənilməsi tələb olunacaq. Ancaq, çıxarılan qərarda hakimiyyət 10 min avro cərimələnmişdi. Sonuncu şikayətimlə bağlı da vəziyyət eynidir. Nəticə təxminən eyni olacaq. Buna görə də hakimiyyətin səhvlərini etiraf etməsi şərti ilə barışmaq təklifinə razı oldum”.
