Rauf Arifoğlu: “Ümid edirəm ki, sözümüz yerə düşməyəcək”
31 Dekabr – Dünya Azərbaycanlılarının Həmrəyliyi Günü ilə bağlı əfv sərəncamının veriləcəyi barədə yayılan xəbərlər ciddi xarakter almağa başlayıb. İndiyədək hər il bu bayram əfvə olan ümidləri artırır.
Siyasi məhbus ailələri də Yeni ilə böyük ümidlərlə baxırlar. Xüsusilə İnsan Haqları üzrə Birgə İşçi Qrupunun fəaliyyətinin bərpa edilməsi bu inamı artırır. Artıq İşçi Qrupu siyasi məhbusların azadlığa çıxması istiqamətində işə başlayıb.
İnsan Haqları üzrə Birgə İşçi Qrupunun üzvü Novella Cəfəroğlu daha öncə “Yeni Müsavat”a açıqlamasında bildirmişdi ki, hazırda İşçi Qrupu məhbusların sənədlərini toplayır: “Xəstə məhbusların siyahısı hazırlanır. Hələ ki məhbusların çoxu bizə müraciət etməyib. Bazar ertəsi İşçi Qrupunun növbəti toplantısı olacaq. Önəmli məsələlərin müzakirəsi gözlənilir. Dekabrda əfvə olacaq ümidlərimiz çoxdur. İşçi Qrupu məhz bundan ötrü yaranıb. Hər əfvdə 4-5 nəfər buraxılır. Hesab edirəm ki, bu dəfə daha geniş əfv olacaq. Sadəcə, buna ümidliyik…”
Siyasi məhbus Tofiq Yaqublu üçün də “Yeni Müsavat” rəhbərliyi müraciət edib. Adətən son vaxtlar ancaq məhbusların özləri müraciət edəndə nəzərə alınır. Bu məqam T.Yaqubluya da aiddir. “Yeni Müsavat” rəhbərliyi isə T.Yaqublunun əfv ərizəsi yazmayacağını bildiyi üçün belə bir müraciət hazırlayıb. Bu məlumatı qəzetin baş redaktoru Rauf Arifoğlu təsdiqlədi. Dedi ki, Azərbaycan prezidentinə T.Yaqublunun və digər jurnalistlərin azadlığa buraxılması ilə bağlı müraciət edib: “Və o müraciəti Əfv Komissiyasına təqdim etmişik. Ümid edirəm ki, sözümüz yerə düşməyəcək”.
Son şərhlər