Xalq artisti Rasim Balayevin səhhətində son illər ciddi problemin olduğu mətbuatda dönə-dönə 
qeyd olunsa da bu müddətdə ona kömək edən olmayıb. Tanınmış kino aktyoru şəkər xəstəliyindən əziyyət çəkir.
“Qafqazinfo” xəbər verir ki, Rasim Balayevin ayağında yaranan kiçik yara şəkəri olduğundan bir qədər də ciddi fəsada yol açıb. Hətta aktyor ötən il bununla bağlı Türkiyədə bir müddət müalicə də alıb.
Artıq bir neçə aydır ki, aktyorun səhhəti onu yenidən narahat etməyə başlayıb. “Şərq” qəzetinin müxbiri Rasim Balayevin hazırkı durumu ilə maraqlanıb. Öyrənmək istəyib ki, görəsən, aktyor özünü indi necə hiss edir.
Rasim Balayev suala belə cavab verib:
“Səhhətimdə ciddi problemlər yaranıb. Bu da məni narahat edir. Hazırda həkimə gedirəm. Böyük mənada müalicəyə imkanım olmasa da məni müalicə edən həkimin ofisinə gedirəm. Nə deyim ki?! Ağrıyıram, şəkər mənim digər orqanlarıma da təsir etməyə başlayıb. İndi mən bu barədə nə danışım ki?! Deyim ki, siz Allah, mənə kömək edin?! Axı bu, mənə yaraşmaz. Mənim kimi aktyorun indi problemini dilə gətirib nəsə deməsi sədəqə ummağa bənzəyər. Ona görə də heç nə danışmaq istəmirəm. Ölərəm, ondan sonra məndən yazıb danışarlar. Deyərlər ki, hə, belə sənətkar idi…”
Rasim Balayevin bu qədər küskün danışması adamı təsirləndirməyə bilməz. Axı onun sözlərində həqiqət var idi. Bizdə sənətkara çox zaman ölümündən sonra qiymət verirlər. Yəqin elə o da bunu nəzərdə tutur və belə deiyr:
“Mən hələ ki, sağam. İnşallah, öləndən sonra hamı üçün maraqlı olacam. Bizdə öləndən sonra onun barədə danışmaq, ölən haqqında veriliş hazırlamaq-filan dəbdi. Sağlığında sənətkarların bir çoxu yada düşmür. Nə deyim ki?! Mənim səhhətim göz qabağındadır. İmkanım qədər müalicə alıram. Amma xaricə gedib orada xəstəxanada yatmağa imkanım yoxdur. Ailəm var. Onların da ehtiyacları var. Başqa gəlir yerim də yoxdur. Təqaüd alıram, vəssalam. Prezident təqaüdündən başqa evimə gəlir də gəlmir. Hardan gəlsin ki?! İş var işləyim? Mən bu vəziyyətimdə də işləməyə razıyam. Təki iş olsun. O da yoxdur. Mən öləndən sonra neyləyirəm desinlər ki, filankəs yaxşı, istedadlı aktyor, sənətkar idi. Mən ki sağlığımda o diqqəti görmürəm. Mən öləndən sonra qəbrimin daşına diqqət göstərsələr, nə fayda?!”
Maraqlıdır, iş yoxdur deyəndə yəni aktyora son illər heç bir rejissor rol təklif etməyib?
Rasim Balayev bildirdi ki, bəzi rejissorlardan arada seriala çəkilmək, filmdə oynamaq üçün rol təklifi gəlib. Ancaq xalq artisti bu təklifləri qəbul etməyib:
“Arada olub ki, filmə, seriala dəvət ediblər. Ancaq məni qane etməyib. Səhnə üçün, tamaşaçı üçün, kamera qarşısında obraz yaratmaq üçün çox darıxmışam. Amma mənə uyğun obraz, məni qane edən ssenari olmadığından təklifləri rədd etmişəm. Mənim yaratdığım elə böyük, xarakterik obrazlardan sonra bu gün təklif olunan primitiv obrazları oynamaq düzgün olmaz. Bu, mənə yaraşmaz. Yaxşı, xarakterik obraz, mənə uyğun ssenari təklifi gəlsə, çox sevərək razı olaram.
Şəkər məni əsəbi edib. Amma həm də işsizlik mənim əsəblərimi korlayıb. İş olsa, başım qarışardı, fikrim dağılardı. Baxın Qərb aktyorlarına, onlar yaşlı olanda da onlara maraqlı obrazlar təklif edirlər, potensiallarını göstərirlər. Bizdə isə bir balaca 40-ı keçdin, səni atırlar qocaların siyahısına. Axı mənim bundan sonra da yaratmaq, işləmək, potensialımı göstərmək imkanım var. Nə isə… Nə deyim? Mən bircə iş istəyirəm. Mənə iş təklifi gəlsin, çalışım. İstədiyim budur. Nə qədər ömrüm qalıb – bilmirəm. Amma içimdə olan yaradıcılıq aclığını doldurmaq istəyirəm. Çəkiliş meydançası üçün çox darıxmışam”.
Son şərhlər