Gürcüstana idxal olunan yanacaq məhsullarının 25%-dən çoxu Azərbaycanın payına düşür

APA-nın Gürcüstan bürosuna Gürcüstan Neft Məhsulları idxalçıları İttifaqından (SING) verilən məlumat görə, bu ilin iyul ayında ölkəyə 101,3 min ton neft məhsulları idxal olunub. İyul ayında isə dizel yanacağı 38,2 min ton, benzin isə 65,1 min ton təşkil edib.

 Məlumatda qeyd edilib ki, yanacağın idxalı iyun ayı ilə müqayisədə 31,2 min ton artıb. Bu ilin əvvəlindən ölkəyə idxal olunan yanacaq 488,1 min ton olub, o cümlədən benzin idxalı 210,1 min ton, dizel yanacağının idxalı isə 278 min ton təşkil edib.

 Ölkəyə daxil olan benzin və dizel yanacağı idxal məhsullarının böyük həcmi Rumıniya, Azərbaycan, Bolqarıstan, Yunanıstan, Rusiya və Türkiyə payına düşür.

 İlin əvvəlindən Azərbaycandan Gürcüstana 122,9 min ton benzin və dizel yanacağı daxil olub. Bu, ölkəyə daxil olan ümumi yanacağın 25,2%-ni təşkil edib.