20 yanvardan bəri Yaponiyanı təsir edən güclü qar yağışı nəticəsində ölənlərin sayı 35-ə, yaralananların sayı isə 358-ə çatıb.
Elchi.az xəbər verir ki, 20 yanvardan bəri Yaponiyanı təsir edən güclü qar yağışı nəticəsində ölənlərin sayı artmaqdadır. Yaponiya Yanğın və Fəlakətlərin İdarə Edilməsi Agentliyinin (FDMA) açıqladığı son məlumatlara görə, güclü qar yağışı və soyuq hava səbəbindən ölənlərin sayı 35-ə çatıb.
Ən çox ölüm hadisəsi baş verən prefektura Niigatadır (12 nəfər), ardınca Akita (7 nəfər), Yamaqata (5 nəfər) və Hokkaydo və Aomori (hər biri 4 nəfər) gəlir. Bundan əlavə, İvate, Naqano və Şimane prefekturalarından hər biri bir ölüm hadisəsi qeydə alınıb. Ölkə üzrə 358 nəfərin, o cümlədən 126-sının ağır, 232-sinin isə yüngül xəsarət aldığı bildirilib. Ölüm halları ilə bağlı ətraflı məlumat verilməsə də, yerli media bəzi insanların qar yığınlarını təmizləməyə çalışarkən damlardan yıxılaraq öldüyünü bildirib.
Qar yağışından ən çox təsirlənən ərazilərdə qarın qalınlığı 2 metri keçib, Aomori’nin bəzi kəndlərində rekord səviyyəyə – 4,5 metrə çatıb.
Ən azı 27 nəfərin öldüyü bildirilirdi
Yaponiyanın müxtəlif bölgələri 20 yanvarda güclü qar yağışı və soyuq dalğadan təsirlənib. Hava şəraiti gündəlik həyata mənfi təsir göstərərək ölkənin bir çox yerində hava, avtomobil və dəmir yolu nəqliyyatında fasilələrə səbəb olub. FDMA-nın 2 fevralda verdiyi açıqlamada güclü qar yağışı və soyuq hava səbəbindən həyatını itirənlərin sayının 27-yə çatdığı bildirilib.
Şayəstə
