Meta Baş Direktoru Mark Zuckerberg bəzi sənaye rəhbərlərinin mümkün bir balondan narahat olmasına baxmayaraq, bu il süni intellekt layihələrinə xərcləri artırmağı planlaşdırdığını açıqlayıb.
Elchi.az xəbər verir ki, şirkət, 2025-ci ilin maliyyə nəticələrinin qiymətləndirildiyi iclasda, böyük hissəsi süni intellekt infrastrukturu üçün olmaqla, bu il 135 milyard dollara qədər xərcləməyi gözlədiyini bildirib.
Bu rəqəm, Meta-nın keçən il süni intellekt layihələri və infrastrukturu üçün xərclədiyi 72 milyard dolların təxminən iki qatına bərabərdir.
Texnologiya nəhəngi süni intellekt yarışında önə keçmək məqsədilə son üç ildə təxminən 140 milyard dollar sərmayə yatırıb.
Zuckerberg 2026-cı ilin süni intellektin iş üsullarını dramatik şəkildə dəyişdirəcəyi bir il olacağını proqnozlaşdırır.
Şirkətin 2025-ci ilin son üç ayına aid məlumatları xərclərin gəlirlərdən daha sürətli artdığını və mənfəət marjlarının daraldığını göstərsə də, açıqlamanın ardından Meta səhmləri Nyu-York birjasında 6,5% artıb.
Zuckerberg davam edən investisiyaların potensial faydalarına toxunaraq, eyni zamanda texnologiya nəhəngində yeni işdən çıxarmaların ola biləcəyinə işarə edib.
O, əvvəllər böyük komandalar tələb edən layihələrin indi bir istedadlı şəxs tərəfindən tamamlana bildiyini və süni intellekt alətlərindən istifadə edərək məhsuldarlığını artıran işçilərlə bu dəyişikliklərə ayaq uydura bilməyənlər arasında böyük fərq yaranacağını qeyd edib.
Meta-nın nəhəng sərmayələrinə baxmayaraq, sektorda bəzi şəxslər 2000-ci ildə baş verən “dotcom” balonuna bənzər bir riskin mövcud olduğunu xəbərdar edirlər.
Cisco Systems Baş Direktoru Chuck Robbins süni intellektin internetdən daha böyük təsir göstərə biləcəyini, lakin mövcud bazarın ehtimal ki, bir balon olduğunu və bəzi şirkətlərin ayaqda qala bilməyəcəyini bildirib.
Oxşar narahatlıqlar JPMorgan Chase və Google rəhbərləri tərəfindən də ifadə olunub, OpenAI Baş Direktoru Sam Altman isə investorların süni intellekt mövzusunda həddindən artıq həyəcanlı olduğu bir dövrdən keçdiyini qeyd edib.
Məryəm
