Video və audio materiallara sürətləndirilmiş rejimdə baxmaq vərdişi beynə mənfi təsir göstərə və unutqanlığın yaranmasına səbəb ola bilər.
Elchi.az xəbər verir ki, bu barədə Braziliyanın Samaritano Paulista xəstəxanasının psixiatrı Tales Alberto “Metropoles” nəşrinə müsahibəsində xəbərdarlıq edib.
Mütəxəssisin sözlərinə görə, sürətləndirilmiş rejimdən istifadə edən bir çox insanda vaxtına qənaət etdiyi illüziyası yaranır. Lakin informasiyanın daimi sürətli qavranılması beynin həddindən artıq tempə öyrəşməsinə və adi həyat vəziyyətlərinin öhdəsindən gələ bilməməsinə səbəb olur. Nəticədə sadə ünsiyyət və ya hadisələrin inkişafını gözləmək belə narahatlıq yarada bilər.
“Hətta qarşıdakı insanı dinləmək kimi adi hərəkətlər belə qıcıq doğura bilər. Bundan əlavə, darıxmaya dözümlülük və informasiyanı dərin analiz etmə qabiliyyəti azalır”, — deyə həkim izah edib.
Alberto qeyd edib ki, sürətləndirilmiş rejimdən tez-tez istifadə edən insanlarda diqqətin cəmlənməsində çətinlik, təşviş və unutqanlıq yarana bilər. Bu, beynin qəbul edə biləcəyindən daha çox informasiya alması və adi stimulları effektiv emal edə bilməməsi ilə bağlıdır.
Mütəxəssis sürətləndirilmiş baxışdan istifadənin məhdudlaşdırılmasını və normal sürətə qayıtmağı tövsiyə edir ki, diqqət, yaddaş və emosional rahatlıq qorunsun. Həkim eyni zamanda diqqət çatışmazlığı və hiperaktivlik sindromu (DÇHS) olan şəxslərə audio və videoların ilkin sürətini dəyişməməyi məsləhət görür — bu vərdiş diqqət problemlərini daha da ağırlaşdıra bilər.
Məryəm
